Katuma 15.000 kr-inik Koda-miit tapiiffigineqarpoq, aningaasallu pisariaqartinneqaqaat, nipilersoqatigiit siuttuat Ludvig Andersen Lyberth oqaluttuarpoq, qilanaaraalu Katuma-p immiussaqqaavisa saqqummersinneqalernerat.
Kodap kalaallit nunaannut aningaasaateqarfianit 15.000 kr-inik peqqammerpusi. Tusarassi qanoq qisuariarpisi?
Nuanneqaaq. Pitsaanerusumik allamik misigisassaqanngilaq, suliarput erinarsuusiavullu upperineqarmata, ulloq nuanneqaaq, immiussavut piviusunngorsinnaalermata. Katumami nipilersoqartinnut sms-erpunga, tassaasunut Karma Brandt, Nukannguaq Kajussen aamma Kristian Otto Therkildsen. Taava saqqassaanik suliarinnittumut Mikael Rasmussenimut allappunga, tunniniaanissamullu attaveqaatitsinnut.
Aningaasat sumut atorneqassappat?
Erinnat 11-it masterernissaannut, allagartarsuarmut, NCB-mut aamma nassiussinermut. Aningaasartuutissat taakku akissaqartissimanngilavut, naak bankimiit taarsigassarsigaluarluta. Taamaattumik Koda-mut qinnuteqarpugut, taperneqarlutalu!
Katumap cd-liaa qaqugu saqqummerserusuppiuk?
Piaarnerpaamik! Sony Airplay-mut nipitai aamma saqqassaa nassiutereerpavut, taakku 500-junngorlugu naqitissavaat. Naatsorsuutigaarput cd septemberip naalernerani saqqummissasoq, allaanngilagut nukappiaraaqqat juulliaqqap unnukkuani.
Katumap siunissaa qanoq takorloorpiuk, suut angorusuppigit?
Angorusutarput siulleq tassa cd-iliatta Brugsenimi, Pisiffimmi Pilersuisumilu pisiarineqarsinnaalernissaa. Taava tusarnaariartitsisarluta nunatsinni angalaarnissatsinnut pilersaarusiussaagut, aamma saqqummersitsisarneq pillugu workshoppiliorusuppugut. Nunatsinni nipilersortartut allat paasiniassavaat cd-mik saqqummersitsiniarnermi suut piumasaqaataanersut aamma aningaasartuutit suusarnersut. Nipilersortartunut erinarsuusiaminnik namminneq saqqummersitserusuttunut iluaqutaassaqaaq.Uanga erinarsuusiarpassuaqarpunga, amerlaqaallu immiunneqarnikuunngitsut. Taammaattumik aamma naatsorsuutigaarput nutaamik saqqummersitseqqissalluta, immiusseqqinnissamut aningaasanik naammattunik katersereerutta.
Kalaallit Nunaanni sumi tusarnaartitsisarnikuuvisi?
Marlussoriarluta Nuif-imi inuusuttut ornittagaanni nipilersornikuuvugut, aamma kulturip illorsuani Katuami, tusarnaartitsineq annertooq Appisimaarta ingerlanneqarmat, nipilersorpugut, ulluni marlunni bandit arfineq pingasut nipilersoqattaarmata taamani. Katumamut ulloq pingaartorsorsuuvoq peqataagatta, neriuppugullu allani suli amerlanerusuni nipilersortarumaarluta. Aamma KNR Nipilersorfik-mi, Inunnguaq Petrussen qaaqqusisoralugu peqataanikuuvugut, apersorneqarluta nipilersortarlutalu. Nuanneqaaq. Suli tusaamasaalluanngilagut, taamaattumik neriuppugut amerlanernit tusarnaarneqartalerumaarluta cd-liarput siulleq saqqummerpat. Musikvideot marluk suliarereerpavut, cd-liarpullu saqqummerniariarpat uploaderniarpavut yuotube-mut facebookimullu, KNR-imullu Tusartaammut nassiussilluta.
Kalaallit Nunaata avataani tusarnaartitsinissassinnut pilersaaruteqarpisi?
Periarfissaasinnaavoq, kisianni uagut Nunatsinnut sammerusunneruvugut, tusarnaartitsiartortarnerit naammassigutsigit, neriuppugut allanut nunatsinniinngitsunut qaaqqusaasalerumaarluta; tassaasinnaavoq 1 agust Tivolimi, immaqa aamma Nunavummut. Sulili aqqutissaq takissaqaaq. Erinarsuusiatsinnik inuit tusarnaarteqqaalaartariaqarpavut, taava tassanngaanniit ingerlaqqissaagut.
Naatsorsuuserinermik akisussaaffeqarlutit suliffeqarputit, erninnguaqarlutillu. Nipilersorneq qanoq piffissaqarfigisarpiuk – qanoq iliortarpit?
Suliffiga angerlarsimaffippullu piffissannik annertuumik atuiffigisarpakka. Nerisassioraangamali, ernerput sinileraagat imaluunniit guitarerfigilaaraangakku, piffissaqartarpunga. Erinarsuutit aalajangersimasut nipilersortanngilakka, erinnanilli nutaanik erinniornissaq misilerartuartarlugu. Taava erinaq nipiluunniit ataaseq nipilersuleriataaraangakku uteqattaalersarpara. Aapparma tamanna iluarivallaartanngikkaluarpaa, nutaamilli erinarsuusioraangama taamaattarpunga. Assigiinnarpaa inussat atorlugit nipilersorneq, erinaa ineriartortillugu, naammassorileraangakku taallaa allallugu misileralersarpara. Taallaasa allanneri ilaanni sivikittuinnaasarpoq, allatigullu sivisoorujussuusarluni.
Qanga aamma qanoq nipilersukkanik soqutigisaqalerpit?
Nipilersuut siulleq pissarsiaraara inuusuttuaraallunga. Yamaha-keyboard pattagiaq, eqqaamavara ingerlaannaq nipilersuutigisinnaanagu tunisisup innaallagissamut ikkuffia minissimammagu. Qujanartumilli Nintendo-spilkonsollen innaallaagissamut ikkuffiata assiganik keyboardertaara ikkuffeqarpoq,nipilersornialeraangamalu taanna atortarpara.
Apersortikkama guitarertaaqqaarpunga. Spansk guitari, erinarsuutillu assigiinngitsut taassuminnga ilikkarpakka, soorlu Marilyn Manson-ip, Blink 182-ikkut, Green Day aamma Korn, atortagaat. Kingusinnerusukkut innaallagissamoortumik guitarertaarpunga, Ibanez Iceman. Torrassuaq, System of a Downs-ikkut guitarertuata piata iluseqataa.
Taava bandiliorpugut, immitsinnullu atserluta Slink 87. Taamani nammineerlunga erinarsuusiortalerpunga, tamarmik kalaallisuut. Atuarfimmi naggataaratta nipilersortitaavugut, Taamani erinarsortuunngilanga guiterertuullungali, taamani erinarsorpiartannginnama – kisimiikkaangama ininni aatsaat.
Nipilersortarnikkut misilittagaqarnerulerpunga Lyngby Efterskolemi atualerama. Taamani arlalinnut nipilersoriartarpugut aamma erinnarsuutinik, ukiup ingerlanerani ilinniakkatsinnik, immiussivugut. Bandeqarpugut pitsaanerpaamik aamma nipilersornermik ilinniartitsisut pitsaanerpaat marluk ilinniartitsisoraavut. Taamani ilikkagaqaqaanga. Taamani arnaatima noqartilissornissamut ilinniartippaanga, bassianut ”erinnaanullu” assamma illugiisillugit atornissaat ilikkarpara. Unnuit tamarluinnangajaasa nipilersortarpunga, efterskolimi atuaqatima ilaanni qinngarisaqisaannik, noqartilissortarfiup akerpiaani videortarfeqarmat. Qaqortumi HHX-serama nipilersoqatigiinni Amsterdamimi erinarsortuulerpunga. Nipilersugassavut nammineerluta taalliorlugillu erinniortarpavut, nipilersortarpugullu handelskolimi aamma gymnasiami festertoqaraangat. Ullut tamaasa sungiusartarpugut, qularissanngilallu nipilersortarfik tipeqartaqimmat, ineerannguungami, qittattaratta nipituumillu nipilersortarluta. Taamani nuanneqaaq. Maanna Nuummi najugaqarpunga, siorna Katuma pilersipparput. Immiussinerput qaammatit arfineq marluk matuma siorna aallartipparput. Kiisamilu piviusunngortissinnaalerparput!
Kikkut isumassarsiorfigisarpigit?
Coldplay pissarsiffigisaqaakka. Isumaqarpunga pitsassuarnik erinarsuusiortartut erinaat nuannersunik. Aamma Kim Larsen isumassarsiorfigilluartarpara, nuannersunik erinarsuusiortuaannarmat. Ilaannili aamma erinarsuutinik alianarpasissunik nikallungasunik sunnertissimasarpunga, immaqa Marilyn Mansonimik tusarnaartarnerma nalaanit pisumik. Taalliakka tassaasinnaasarput paquminaasartut, ulluinnarni oqaluuserineqarneq ajortut. Isumaqarpunga erinarsuutigissallugit ajunngivittartut – pingaartumik erinaat nuannaarpaluttuugaangata. Tamanna pitsaasumik akuleriisitsineruvoq.
Qanga erinnioqqaarpit, suna imaraa?
Meeqqat atuarfianni suli atuartuullunga erinarsuusioqqaarpunga, imaraalu asannilernera siulleq. Ajoraluartumilli taamani erinarsuusiarisartakkakka annaanikuuvakka, ikitsuinnaallu pigilerlugit, amerlanertigut asanninnermik asannilersoornermillu imaqartarput.
Kalaallisut erinarsuusiortarputit. Sooq?
Oqaatigeriikkattut aarlaqqaammut tuluttuunik erinarsuusiortarpunga. Taakku akuttoqatigiissaarnissaat ajornangeqigamik, erinniortorsuarnillu tusarnaartakkannik sunnerneqarsimallunga, taamani tuluttut taalliorneq uannut assut isumaqarpoq. Kisianni tuluttuunik nipilersoraangatta allarluinnaasarpoq. Uannut tusarnaartunulluunniit isumaaruttutut ittarami. Taamaattumik kalaallisuunik taalliortalerpunga, tusarnaartullu nuannaraat – immaqa aamma uanga danskisut tuluttullu oqalussinnaanera killeqarmat, qularnanngilaq suna erinarsuutigineringa tusarnaartut paaserpiarsinnaasarsimassanngilaat.
