Fotograf: Dida G. Heilmann
Arctic Sounds aprilip aallartilaarnerani sisamassaanik festivaalertitsilerpat, nipilersoqatigiit Malik pingaarnertut nipilersortuussapput. Malik-kunni erinarsortuusoq Malik Kleist siullermeerluni Arctic Sounds-imi tusarnaartitsissaaq, naak tamanna tassaanngikkaluartoq erninniortup erinarsortartullu misilittagatuup Sisimiuni tusarnaartitsinera siulleq.
Malik Kleist 19-inik ukioqarluni nipilersortartutut aallarteqqaarami, nipilersornermik erinarsornermillu misilittagaqanngilaq:
"19-inik ukioqarlunga nipilersuusiortalerpunga, taamaammallu ukiut 21-nngulersut nipilersornermik suliaqarnikuullunga. Aallaqqaammut nipilersoqatigiinni nipilersoqataaneq misiliinnarniarpara, nipilersuummik ataatsimillunniit atuisinnaanngikkaluarlunga. Ikinngutimalu ilaat nipilersoqatigiiliorpugut, uangalu bassertuuneq misilippara, kisiannili ilikkarpiarsinnaanangu. Erinarsortartoqannginnattalu bassi iliinnariarlungu mikrofoni paarlaallugu misilippara. Taallami allassimasut sapinngisannguannik suaartaatigivakka, nipilersoqatimalu tamanna nuannarivippaat tupaallaatigalugulu. Ingerlaannaq oqarput erinarsortalissasunga, paarlallungalu bassertussamik nassaarlutik".
Tamanna isumassarsiatsialaavoq – tusagassiuutit arlaqartut Malik Kleistip erinarsornera pillugit ilaatigut allapput Pearl Jam’s-imi Eddie Vedder-ip aamma Soundgardens-imi Chris Cornell-ip akornanniittoq. Nipilersoqatigiillu Chilly Friday pilersinnerisigut Malik Kleistip nipini pimoorullugu saqqummiuppaa:
"Piffissap ilaa nipilersoqatigiit arlallit nuttarfigaakka, 1999-imi Chilly Friday-mik Alex Andersen peqatigalugu aallartitsinerma tungaanut. 2007-ip tungaanut ingerlavugut, sisamanik nuusiorluta, sølvinnalluta Kalaallit Nunaanni nunanilu allani arlalippassuarni tusarnaartitsisarluta. Taamativinngisaannaraluarpugut - nipilersoqatiigiittarunnaaginnarlutali, nammineq suliffigut ilaquttagullu ulapputigatsigit," Malik Kleist Chilly Friday-mi peqataanini pillugu oqaluttuarpoq.
Malik nipilersornermik nuannarinnilersitseqqippoq taalliornissamullu kajumilersitseqqilluni
2012-imi Malik Kleistip nipilersoqatigiit Malik pilersippai, maannalu ukiuni sisamani nipilersoqatigiittarnikuupput, Chilly Friday-miinnerminilu ukiuni kingullerni taalliorsinnaajunnaaraluarneq misigisani qaangeriartorpaa:
"Chilly Friday-mi uninnitta kingorna nipilersortartutut ingerlaqqeriarnissara pisariaqartittutut ippara. Erinarsuuterpassuit tassanngaannaq pikialaaqqilerput, ukiuni marlussunni Chilly Friday-mi allassinnaajunnaqqereernerma kingorna. Uagutsinni immiussiveeranngualiornikuuvunga, tassanilu ukiorpassuarni erinarsuusiorusaartarlunga. Qanoq immiussisoqarsinnaanera ilinniaqqaartariaqarpara, aqqutaanilu guitarernermik piginnaasakka pitsaanerulerput. Tamatuma kinguneraa erinarsuutit siusinnerusumiit pikkunarnerulernerat. Nuusianni siullermi erinarsuutit tamaasa nammineq suliarivakka, kingornagullu Københavniliarlunga nipilersortartut pikkorilluinnartut peqatigalugit immiuppakka. Kisianni nipilersortartut amerlanersaat Danmarkimi najugaqarmata, ataaserlu Sisimiuniilluni nipilersoqatigiit katersuutsinnissaat ajornarluinnangajavippoq. Taamaallaat guitarertorput ataaseq maani Nuummi najugaqarpoq. Taamaammat aalajangerpunga nipilersortartunik maani najugalinnik ataatsimoortitsiniarlunga, nipilersoriartarniassagatta sungiusaqatigiittarlutalu," Malik Kleist oqarpoq nangillunilu:
"2016-imi nuusiatta aappaa suliarilerlugu, producerera isumaqatigiissuteqarfigivara, nipilersoqatigiinni Qillannguaq Berthelsenikkunni bassertartuusoq. 2015-imi nuusiornerput aallartipparput, ukiorlu qaangiuttoq naammassillugu. Nuusiatta aappaani erinarsuutit Qillannguaq Berthelsen peqatigalugu suliaraakka, namminerlu taalliorlunga. Nipilersoqatigiit nutaat melodiskiunerusumik nipeqarput, naak suli rock-ip sakkortunerusup akornanniikkaluarluta. Malimmi guitarertutta ilagaat Angunnguaq Larsen, Chilly Friday-mi aamma guitarertuusoq. Angunnguaq Malik aallartimmalli peqataavoq, 2016-imilu ataasiarluta Chilly Friday katersuutseqqillugu Katuaq ulikkaavillugu tusarnaartitsigatta peqataallunissaaq".
Chilly Friday aamma Malik – ’the godfathers of greenlandic stadium rock’
Nipilersoqatigiit Chilly Friday taaneqarnikuupput ’the godfathers of greenlandic stadium rock’ – taamannallu taaguusiineq Malik Kleistip isumaa malillugu naapertuuppoq:
"Malimmi teknikkimik atuineruvugut - tight band-iunerulluta, riff-imik tunngaveqarnerusut, kisiannili aamma taktip tungaatigut misileraanerulluta. Taamaammat nipilersukkagut stadium rock-imut assersuutissallugit tulluulluinnarpoq. Arlallit tupaallallutik pikkorilluinnartutut nipilersornerartarpaatigut, tamannalu tusarnaartunit tusarlugu nuannertaqaaq. Aamma sapinngisamik ”tight”-iunerpaamik saqqummernissarput anguniarlugu sukataartaqaagut," Malik Kleist nangippoq.
Malik Arctic Sounds-imi
Nipilersoqatigiit ”Malik” ukioq manna Sisimiuni Arctic Sounds festivaalimi pingaarnerit ilaattut nipilersussapput, taannalu 6. april aallartissaaq, Nunanit Avannarlernit nipilersuutit ulluni sisamani aallutarineqarlutik:
"Arctic Sounds festivaalimut peqataanissarput assut uagutsinnut pingaaruteqarpoq: Misigisimavugut arriitsumik qaffakkiartuaarluta, Kalaallit Nunaannilu rockimik nipilersortartut nuimanerit ilagilersimallugit, tamannalumi anguniarlugu suleruluttaqaagut. Nipilersullammaavugut, nipilersornermik nuannarisaqarluinnartut, tamannalu attattuarumallugu ilungersortuarpugut," Malik Kleist festivaalimi peqataanissaminut qilanaaqisoq oqarpoq.
Pingaarnerpaavoq tusarnaartut nipilersukkatsinnik nuannarisaqarnissaat
Malik Kleist-imut pingaarnerpaavoq nipilersukkaminnik tusarnaartut nuannarisaqarnissaat, sumi nipilersornerlutik apeqquttaatippallaarnagu:
"Maanna anguniaannarpagut inuit nipilersukkatsinnik nuannarisaqarnissaat, tusarnaartitsisarnissarput immaqalu nuusioqqinnissarput. Toqqaannartumik nipilersorneq nuannareqaarput, Nunatsinnilu festivaalini anginerni nipilersortarnissarput neriuutigalugu. Nunanit allanit soqutiginnittoqarpat, ajussanngeqaaq, aamma taamaaliorumavugut, kisianni pisussat takkussuunneri malinnassavagut. Nunani allani nipilersorneq nuannareqaarput, qanittumilu Islandimeeqqammerpugut, taamannalu nipilersorneq nuannivippoq. Neriuppugut periarfissaqaqqilerumaarluta," Malik Kleist naggasiivoq.
Arctic Sounds pillugu uani annertunerusumik atuagassaqarpoq.
