nutaanik nipilersuusiorniaraanni anersaartorfissaqartitsilersinnaavoq
Pingasunngornermi ulloq 11. januar Kodap tamanut aningaasaataanit qinnuteqaateqarnissaq ammaanneeqarpoq. Ole Bjørn Sørensenimit Dúnémeersumit aamma Villads Tyrrestrup Østerimit Lissimeersumit 2015-imi suliniutinut nutaanut tapiissutinik pissarsisunit qinnuteqaatit pillugu siunnersorneqarit.
Ole Bjørn Sørensenimut – synthesizerimik nipilersortartumut, programmiliortartumut, ingerlatsisumut erinarsuusiortarmillu, immaqali rockertartuni Dúnémi nipolersoqataasartutut ilisimaneqarnerusumut, Kodap tamanut aningaasaanit taperserneqarnissamik qinnuteqaateqarnissamik periarfissaqarneq pingaaruteqarsimaqaaq. Nipilersortartut albumit sisamassaannut, Delta, suliarineranut taperserneqarnissamik qinnuteqarput:
"Uagutsinnut kinguneqarpoq, Dúnémi Deltamik suliaqarnitsinni pilersaarutitsinnit piffissaq sivisunerulaartoq atorsinnaasimagipput. Kinguartitsisaqattaarpugut, tassa qanoq oqariartuuteqarnissatta pingaarnera aalajangernissaa suliariuaannaratsigu. Immiussisarfimmik attartorneq akisoorujussuuvoq, tassanilu tapersissutit iluaqutaalluarput", Ole Bjørn Sørensen oqaluttuarpoq.
Tapersiissutit periarfissiipput
Kodamit taperserneqarnissamik qinnuteqarneq pitsaasuuvoq, Ole Bjørn Sørensen isumaqarpoq, tamannalu pilersitsinissamut kiffaanngissuteqartitsilersarpoq.
"Nipilersuusiorneq akisoorujussuuvoq, aningaasanillu isertitsiniarluni nipilersuutinik pilersitsiniaraanni ilumoortuuneq qamanngalu pisut akuttunngitsumik annaaneqartarput. Taamaammat Kodamit aningaasarpaalunnik pissarsinerup anersaartorfissaqalerneq assigaa, tamassumanilu pingaarnerit samminissaannut periarfissiisarpoq", Ole Bjørn Sørensen oqarpoq.
Ole Bjørn Sørensen taperserneqarnissamik qinnuteqarnerup suliarinerani siunnersuutai pitsaanerit pingasut ataani takusinnaavatit.
- Eqqarsarluarit – missingersuutitit suliarigukkit piviusorsiorit.
- Erseqqissuliorit – aningaasat sumorpiaq atorneqassappat
- Aammalu nipilersukkat naammassippata qanoq pisoqarnissaanik isumaliutersuuteqarit. Nipilersukkatit avataanit qanoq pissarsiarineqassappat?
Singleli nutaaq naammassingajalerpoq
"Deltap naammassinissaa suliaqarnartorujussuuvoq", Ole Bjørn Sørensen oqarpoq naggasiillunilu: "Januarimi singleli, Fall Back saqqummersissavarput. Taanna albummiminngaaneersoq, pikkorissorli Oh Land takkuppoq peqatigaluta tusarnersorsuanngortinniarlugu allanngulaarniarlugu".
Tapersissutit atorfissaqartilerlugit pissarsiaraagut
Elektropopimik nipilersortartunut Århusimeeersunut inuusuttunut, Kodamit tapersiissutit aamma pingaaruteqartorujussuunikuupput:
"Albumimut saqqummerseqqaakkatsinut, Try, nipilersukkat siulliit marluk suliarereeratsigit Kodap tamanut aningaasaataanit tapersiissutinik qinnuteqaateqarpugut. Immiussinissamik isumaqatigiissusiunnginnitsinni Kodamit tapersiissutit pissarsiaraagut, taamaammat aningaasat atorfissaqartilerlugit pissarsiaraagut. Immiussisarfinni assigiinngitsuni immiussinissamik taamaalilluta periarfissalerpugut, ilaatigut Londonimi Barcelonamilu", Villads Tyrrestrup Øster oqaluttuarpoq – Lissimi erinarsortartoq bassertartorlu.
"Danmarkimi Kodaqarmat iluatatsitaasorujussuuvugut", Villads Tyrrestrup Øster oqarpoq nangillunilu: "Kikkut tamarmik Kodap aningaasaataanit qinnuteqarsinnaapput, taamaammat qinnuteqanngikkaanni sianiilliortoqangajassaaq. Immiussisarfimmiinnermi akisoqaaq".
Villads Tyrrestrup Østersip taperserneqarnissamik qinnuteqarnerup suliarinerani siunnersuutai pitsaanerit pingasut ataani takusinnaavatit
- Suliniutit sooq allaanerunersoq nassuiaruk.
- Sorpassuit AKISOORUJUSSUUPPUT, taamaammat aningaasat ”pingaarnernut” tulleriiaarlugit atukkit, assersuutigalugu immiussisarfimmiilluarnissamut.
- Nutaat misilerarnissaat eqqaamasariaqarpoq, qinnuteeqarnissarlumi ajoqutaanavianngilaq.
Nipilersukkat nutaat naammassingajalerput
Liss, ukiuni ikitsuinnarni nipilersortarnikut, amerlanernut sanilliullugu misigisaqarnerulereernikuupput. Nipilersoqatigiit ilaatigut siorna Årets Steppeulvimi 2016 Ukioq manna neriunartutut nersornaaserneqarput. Liss saqqummersitassartik tulleq maannakkut suliaraat. Villads Tyrrestrup Øster naggasiivoq: ’Annertunerpaamik naammassisarniarsarisarpugut, ullullu tamaasa nipip nutaap misissornissaa pillugu isumassarsiaq aallaavigalugu sulisarpugut’.
Qinnuteqarninni aamma pingaartineqartussat
- Suliniut piviusorsiortuussaaq, qinnuteqartullu suliassai ersarissapput.
- Suliniut ersarissumik allaaserineqassaaq, qinnuteqartullu Kodami ilaasortatut suliamut atassuteqarnera ersarissaaq
- Suliniutip naammasineqarnissaata ilimanaateqarnera qinnuteqaat tunngavigalugu nalilersorneqarsinnaassaaq.
- Immiunneqartut amerlanersaasa nammineq nipilersuusiarineqarsimanissaat piumasaqaataavoq.
- Aningaasartuutereriikkanut atortunulluunniit pisinernut tapersiisoqarsinnaanngilaq.
- Nipit fiilii suliniummik takutsitsissapput aamma/imaluunniit qinnuteqartup nipilersornermik ingerlatsineranik ersarissumik takutitsissallutik.
- Inassuteqaatigaarput nipit fiilii ataatsimiititaliap tusagassai tulleriinnilersussagitit.
Kodap tamanut aningaasaataanik qinnuteqaateqarnissamut piffissaq kingulleq tassaavoq pingasunngorneq ulloq 1. februar 2017 nal. 16:00, internetikkullu qinnuteqarnissaq ulloq 11. januar ammarpoq.
Kodap tamanut aningaasaatai pillugit uani annertunerusumik atuarit
2017-imut Kodap Aningaasaliinermut Ataatsimiititaliaa
Martin Stauning (DKF)
Martin Stauning Det Kongelige Danske Musikkonservatoriumip kisimiilluni nipilersornermik ilinniarfiani oktobarimi 2016-imi naammassivoq. Ilaatigut ilinniartitsisorinikuuai Hans Abrahamsen, Bent Sørensen aamma Niels Rosing-Schow. Martin nipilersoqatigiinnut assigiinngitsunut nipilersuusiortarnikuuvoq, nipinullu atortulersuinermik tusarnaartitsisarnermillu suliaqarnikuulluni. Martin 2015-imi Axel Borup-Jørgensenip nipilersuusiortartunut nersornaataanit nersornaatisivoq 2016-imilu Léonie Sonning Stipendium og Carl Nielsen og Anne Marie Carl-Nielsenip aningaasaateqarfianit aningaasaliiffigineqarluni.
Lars Greve (DJBFA)
Lars Greve nipilersuusiortartuuvoq, saxofonertartuuvoq klarinetertartuullunilu. Kisimiilluni suliniuteqartarnermi saniatigut ilaatigut nipilersoqatigiinni Girls in Airports maluginiarneqarnikuuvoq, aammalu erinartortartuni imaannaanngitsuni arlalini soorlu Peter Friis Nielsen, Sven-Åke Johansson, Zeena Parkins, Rob Mazurek, Quadron, Oh No Ono allarpassuarnilu nipilersortarnikuulluni. Nipilersoriaasia assigiinngiiaartorujussuaq misileraaffiusartorlu nunat tamat akornanni nipilersortarnermik nersornaaserneqartarnermillu kinguneqarnikuuvoq, ilaatigut ukuninnga nersornaaserneqarnikuulluni Statens Kunstfond, Odd Fellow Scholarship og Sonningip piginnaasalinnut nersornaasiuttagaa.
Lars Sjelle (Nipilersukkanik saqqummersitsisartoq)
Lars Sjelle Danmarkimi Warner Chappellimi Creative Manageriuvoq, ukiullu 20-t sinnerlugit nipilersukkanik saqqummersitsisartutut sulinikuulluni.
Lars ukiut ingerlaneranni Warner/Chappellimi erinarsortartunik erinarsuusiortartunillu amerlasuunik suleqateqartarnikuuvoq, ilaatigut Sanne Salomonsen, Jam & Delgado aamma Adam Powers.
Larsip maannakkut ilaatigut Pitchshifters, Frederik Tao, Kristian Leth, Peter Bjørnskov, Burhan G, Chris Minh Doky, Mintman, Faustix, Kato & Louis Winding suleqatigai.
Tobias Stenkjær (DPA)
Tobias Stenkjær erinarsuusiortartutut nipilersortartutullu siusissukkut allartoppoq. 2011-imi 17-inik ukioqarluni immiussaq ”Toby” saqqummersippaa. 2009-imi countrymik immiussatut pitsaanertut saqqummersitaq ”Blissfully unaware” pillugu nersornaammit DMA-mit nersornaaserneqarpoq 2012-imilu EP popperpalaartoq ”Changing” saqqummerpoq. Kingulliit marluk nammineq atini atorlugu saqqummersippai. Tamassuma saniatigut Danmarkimi nunanilu allani nipilertartunut arlinnut taakkulu peqatigalugit erinarsuusiortarnikuuvoq, ilaatigut X Factorimi ajugaasoq Ida, Bryan Rice, spaniamioq Auryn aamma hollandimioq Ben Saunders.