Arfininngorneq septembarip 29anni Koda Awards agguaanneqassallutik Hotel Hans Egedemi ataatsimiittarfimmut matut ammarpata, nipilersoqatigiit Tiu, Frederik Elsner kiisalu nipilersoqatigiit Atsinnermiut peqataassappput. Taakkua tamarmik 2017imi saqqummersitatik pillugit Ukioq 2018imi Nersornaasigassatut piukkunneqarput.
TIU, ’Nuunneq’ pillugu
TIU, tassaapput erinarsortartoq, Pernille Kreutzmann guitarertartorlu, Ivik Larsen, kiisalu nipilersoqataasut, Nukaaka Josefsen Petersen aamma Apunnguaq Schmidt. TIU piukkunneqarpoq saqqummersitaq ’Nuunneq’ pillugu, piukkunneqarnerlu guitarertumut, Ivik Larsenimut erinarsortumullu, Pernille Kreutzmannimut pingaaruteqaqaaq:
PERNILLE KREUTZMANN OG IVIK LARSEN
’Piukkunneqarnerput nuannarutigeqaarput, nipilersortartutullu annerusumik tunniussinissatsinnut kajumissaataalluni. Kalaallit Nunaanni nutaamik allaanerusumillu pilersitserusulluta allanullu pilerisaarerusulluta nipilersugassioratta, suliatta tigulluarneqarlutik akuerineqarnerat qujamasuutigaarput’.
Saqqummersitsisuuvoq Atlantic Music, marluullutillu nipilersoqatigiittartut pillugit taakkua allapput:
"Saqqummersitaq erinarsuutinik marlunnik imaqarpoq, tumerparpaartoqanngilluinnarpoq Ivik Larsenilli guitarerpalunnera/kukkilattarpalunnera kiisalu Pernille Kreutzmannip erinaa tusarnerluinnartoq tusarsaallutik. Erinarsortartoq erinagissoq nutaaq pinngorpoq! Ukiut kingulliit qulit ingerlaneranni aatsaat erinnamik taama pissanganartigisumik tusarluta oqarutta ingasaassinerunngilaq. Pernille Kreutzmann qularnanngitsumik kikkut tamarmik ilisarisimasarilissavaat, nunatsinnimi assissaqanngilaq, guitarimillu tusarnerluinnartumik kukkilattartumik ingiorteqarami, sakkortusaateqarpalugatik nipilersornerisa erinarsornertaa pissusissamisut qanilaarpalulluni. Siullermik saqqummersitsisut taama pikkunartigisumik saqqummersitsisarnerat qaqutigoorpoq, erinarsuutillu misigissutsinik qaffaatitipput inuunermik nuannersititsillutik. Erinarsuutit ilaat qiimarpaluttut ilaat alianarpalupput, play-ilu tuuginnarlugu marluullutik nipilersoqatigiit silarsuaannut pulasariaannaalluni’.
Pernille Kreutzmann aamma Ivik Larsen nangipput:
"Siullerpaamik immiussarput saqqummersitsisarfimmi Atlantic Musicimi immiupparput, iluatsitsillutalu produceri pikkorissoq Jacob Christopher Andersson suleqatigivarput, tassumalu nipilersukkagut angakkuartutut qaffatsittutut illugit pitsanngorsarpai. Kalaallisut taaliorpugut, oqaatsillu ullutsinni atorneqarpiarunnaartut, annerusumik assersuutitut atorneqartartut" pinnguariniarsarinikuuagut. Taama iliorpugut, allanut isumassarsiuutaasinnaaqqullugit, oqaatsittalu pingaartinnerulernissaat anguniarlutigu. Saqqummersitarput inuiaqatigiinnut kalaallinut tunissutigaarput, Ivik Larsen aamma Pernille Kreutzmann oqaluttuarput.
Frederik Elsner, kisimiilluni saqqummersitani ’F’ pillugu
Frederik Elsner, nipilersoqatigiit ’Nanook’ peqatigalugit tusaamaneqarnerusoq, kisimiilluni saqqummersitani ’F’ pillugu piukkunneqarpoq, TIU-kkutut aamma Frederik aamma oqarpoq, piukkunneqarneq nammineq pingaarteqalugu:
"Piukkunneqarneq eqqumiitsuliortutut uannut pingaaruteqartupilussuuvoq. Iluamik suliaqarsimanermut tamanna takussutissaavoq. Suliariniagara ’F’ ukiuni sisamani suliarinikuuara, nunatsinni nipilersukkanik allaanerusunik qinigassaqarnissaq eqqarsaasersuutigalugu. Angalaarnissat, immiussisarfimmiinnissat kiisalu nunat avannarliit akornanni suleqatigiit eqqarsaatigalugit ataqatigiissaariniarneq suleruloornarnikuuvoq. Nunatsinni angalaniarneq akisoqimmat tapiisinnaasunut qinnuteqartariaqartarnikuuvugut. Taamaammat piukkunneqarnera kiisalu 2017imiit manna tikillugu CDp iTunesikkullu tunisaalluarnera assut tulluusimaarutigaara."
FREDERIK ELSNER
Kulturikkut kinaassutsikkullu assigiinngissutit akimorlugit nipilersukkat inuit kattutsissinnaavai
Saqqummersitassani ’F’ suliaritillugu, nipilersukkat taakkualu nukigat Frederik Elsnerip assut eqqarsaasersuutigisarsimavaa:
’Ukiuni arlalinni Kalaallit Nunaanni nunanilu allani nipilersortartut akornanneereerlunga, nammine inuttut misilittagaqalerlungalu eqqarsaasersuuteqartarpunga. Tamakkua ilagaat, inuit kulturikkut kinaassutsikkullu assigiinngikkaluartut, nipilersukkanik kattutsinneqarsinnaanerat.
Nipilersukkat kattunnissamik ataatsimoornissamillu periarfissiisarput, kulturittalu nukittoqutaannik oqariartuuteqartarlutik’.
Nipilersoqatigiit Nanook ilagalugit Frederik Elsner Kalaallit Nunaanni, Danmarkimi, Asiami, Skandinaviami USAmilu nipilersortarnikuuvoq:
’Sumiiffinni tamani oqaatsigut nipilersornitsinni salliutinneqarlutik soqutigineqartarput. Tamanna uanga maluginiarlugu, nipilersortartut nunanit avannarlerneersut, tamarmik immikkut nipilersoriaasillit peqatigisarlugit kisimiillunga saqqummersitsinissannut nukissaqalerpunga. Nunani Avannarlerni kattussinnaanerput nukittoqutigalugu, ataatsimut kinaassutsitta nipilersornikkut annissinnaasarnerat eqqumaffiginiarnikuuara. Kalaallisut oqaatsigut sulianni qitiupput, nipilersukkalli tamarmik nunanit avannarlerneersuullutik’, Frederik Elsner nassuiaavoq nangillunilu:
’Nipilersortartut Nunanit Avannarlerneersut suleqatiginiarnerannut pissutaavoq, nipilersugassiat immikkut nunani avannarlerni nipilersortariaatsit atorusunnerat – tamannalu suleqatigiinnikkut anguneqarsinnaavoq. Nipilersortartut nunanit avannarlerneersut namminneq nipilersoriaasaat uannut misigissusiliisarninnullu tulluartsinneruakka. Nunani avannarlerni nipilersortartut peqatigalugit immikkut ittumik suliaqarusuppunga, qanoq nipilersuusiornissaq uannut tulluarnerutitara aallaavigalugu’.
Koda Awards annertuumik pingaaruteqarput
Frederik Elsner isumaqarpoq KODA Awards Kalaallit Nunaanni pingaartinneqartut:
’Eqqumiitsuliortunut uattut ittunut immikkut pingaaruteqarpoq, nipilersuusiat pillugit akuerineqarnissaq.
Taamaammat nersornaasiisarnerit ingerlaannartariaqarsoraakka, aammami ingerlalluaqaat. Nipilersoriaatsit inerisarnerat eqqarsaatigalugu aamma allannguuteqartoqassaaq, KODAp Komitéani pitsaassuseq nutaaliortarnerlu eqqumaffigineqarmata, tamanna siunissami kalaallit nipilersoriaasaannik ineriartortitseqataassaaq’, Frederik Elsner naggasiivoq.
Atsinnermiut – siullermik saqqummersitartik ’Atsinnermiut’ pillugu piukkunneqarput
Nipilersoqatigii Atsinnermiut tassaapput erinarsortoq rytmeguitaristiusorlu, Apunnguaq Schmidt, ataasiukkarisarluni guitarertoq, Kristen Larsen, pattagiaq/keys, Laura Lennert JensenLaura Lennert Jensen, bassertoq, Aqqualoorak kiisalu tumerparpaartoq, Jens Christian Lyberth Jensen (Jaqqi), taakkualu tamarmik Ukioq Manna Nersornaasigassatut piukkunneqarnertik assut nuannaarutigaat:
’Ukioq Manna nersornaasigassatut piukkunneqarnerput tulluusimaarutigeqaarput. Tamatuma tamanut siammaannissaa akunnialunnik sioqqullugu Inunnguaqerinarsortutsinnut punnguamut sinerpoq oqarfigalugu nersornaasigassatut piukkunneqartugut. Soorunami Apunnguup ingerlaannarluni kkalerrippaatigut, uangali soorlu aatsaat aqagukkut nutaarsiassani atuarakku aatsaat iluamik paasigunarpara.
Nersornaasigassatut piukkunneqarnerput tulluusimaarutigeqaarput, minnerunngitsumik piukkunneqartut allat pikkoreqimmata, uagullumi nukarlersaalluta. Tamanna uagut nipilersukkagut pillugit nersualaarinertut suliattalu pitsaaneranut naqissusiisutut tiguarput, ukiummi kingulliit sisamat suleruloornikooqigatta’, Laura Lennert Jensen oqaluttuarpoq.
ATSINNERMIUT, FOTOGRAF: DORTHEIVALO L. JENSEN
Peqataanissartik qilanaaraat
Koda Awards ukioq manna nipilersukkatta pitsaassusaannik naqissusiliisuummat peqataanissatsinnut qilanaaqaagut:
’Koda Awards uagutsinnut pingaaruteqaqaaq, suliatsinnut pitsaassutsimik naqissusiliisuummat. Ukiuni kingullerni suleqatigiinnikuunerput kingut qiviarlugu qujamasunnissatsinnut periarfissaqalerpugut, nipilersuusioqqinnissamullu qiimmassaataalluni. Nuannaarutigaarput Koda Awards taalliortunut erinniortunullu akuersissutaasutut pilersinneqarnikuummat nuannaarutigaarput, qanorluunniimmi nipilersoriaaseqaraluaraanniluunniit akuerineqartutut tamanna misigititsisinnaammat’, Laura Lennert Jensen nassuiaavoq.
Siullerpaamik saqqummersitaq
Atsinnermiut saqqummersitaat aamma taamatut taaguutilik nersornaasigassatut piukkunneqarpoq:
’Aatsaat saqqummersitsivugut, taamaammallu atsertariaqaratta Atsinnermiut atsiunnikuullutigau. Ukiut sisamat matuma siornali erinarsuusiulernikuuvugut, aqqanillillu saqqummersillugit – Atsinnermiut ilisaritillugit. Taallani assigiinngitsorpassuit sammineqarput, asanninnilersaarutiniit (soorlu Arnannguaq, Uummatima tillernera il.il.) inuiaqatiginni pissutsinik isorinninnernut tunngasunut (ass. aallarniut Kalaaleraa). Naatsumik oqaatigalugu, ullutsinni kalaallit inuusuttut eqqarsaasersuutigisartagaattuut takorloorneqarsinnaasut taalliaraagut. Sisimiuni nipilersornermik ilinniarfimmi sungiusartarfitsinni saqqummersitarput, qaammatit sisamat missaanni nammineq immiunnikuuarput, tamatumalu saniatigullu Kalaallit Teknikkimik Ilinniarfimmi immiussisarfik qujamasuutigeqisatsinnik erinarsukkanik immiussivigalutigu. Saqqummersitaq Københavnimi Sepia Productionsimit mixerneqarlunilu masteri suliarineqarpoq, angingaasartuutillu Kodamit taperneqarnikkut uagulu nammineq ipilersortarnitsinnit sipaakkatsinnik matussuserneqarlutik’, Laura Lennert Jensen itisiliivoq.
Taaguut ’Atsinnermiut’ immikkut isumaqarpoq
Nipilersoqatigiimmi taaguuserput ’Atsinnermiut’, tamannalu immikkut isumaqarlunilu pingaaruteqarpoq:
’Toqqaannartumik nutserlugu tassaavoq ’ataaniit takkuttut’. Tamanna inuit namminneq assigiinngitsunik isumasiorumaarpaat. Tamatumunnga nassuiaataasinnaasut ilagaat, tallimaalluta tamatta alliartornitsinni ”kakkanniartuunikuunnginnerput”. Inuit atsinnerusutut inissinneqartartut, nipilersornerup silarsuaani nunarsuatsinni inissaminnut inissittut’, Laura Lennert Jensen naggasiivoq.
Koda Awards ingerlanneqassaaq arfininngorneq septembarip 29anni, Hotel Hans Egedep ataatsimiittarfiani nal. 20:00, KNRikkullu toqqaannartumik aallakaatinneqassalluni.
