Asseq: Siornatigut Koda Awards agguaanneranni, 2013-2014imi saqqummersitani Raatiu Nukik pillugu, Uyarakq (Aqqalu Engell) Talentprisimik nersornaaserneqarmat. Ass.: Inuuteq Kriegel.
Koda Awards septembarip 29anni Hotel Hans Egedemi agguaanneqalerpata Nuummi persuarsiutigineqassaaq.
Sapaatip akunnerata tuliani Koda Awards agguaanneqalerpata, kalaallit nipilersornermik kulturiannik Koda tapersersueqataassaaq. Nersornaasiineq arfininngorneq septembarip 29anni Hotel hans Egedep ataatsimeersuartarfiani nal. 20:00 aallartissaaq, isernerlu akeqanngilaq.
"2017imi saqqummersitat nuannersut amerlaqimmata, ukioq manna nersornaasigassatut piukkunnartut pingasut nassaariniarnerat unammillernarpoq, nersornaasiinermut komitémi ilaasortaq Andreas Poulsen oqarpoq, nangillunilu: ’Koda Awards aqqutigalugu kalaallit erinniortut taalliortullu nersorniarneqarput, toqqaaniarnitsinnilu pitsaassuseq immikkuullarissuunerlu pingaartinneruagut. Ukioq manna KNR suleqatigalugu Koda Awards toqqaannartumik TV-kkut aallakaatinenqarsinnaammat nuannaarutigaarput. Persuarsiorluni kalaallit nipilersortartut nersorniarneqarnerat Nunatsinni tamani isiginnaarneqarsinnaanissaa pingaartipparput. 90´-ikkunnili Koda Awards tassaavoq Kalaallit Nunaanni nipilersortarnerup iluani nersornaatit pingaarnersaat, Nunatsinni nipilersortartunut inuiaqatigiinnullu iluaqutaasartoq. Ukiut tamaasa kusanartumik persuarsiornissarput anguniartarparput, illoqarfinnilu allani aamma siunissami aaqqissuisarnissatsinnut periarfissat misissorlutigit."
Nersornaasiinermut komitémi ilaasortat tusagassiuutineersut kattuffinneersullu tassaapput: Andreas Poulsen KNR-imiit, Noah Mølgaard AG-miit, Dorthe Olsen, Sermitsiaq, Nukannguaq Geisler, Nunatsinni Nipilersortartut Kattuffiat sinnerlugu kiisalu Kodap sinniisuutitaa, Kimmernaq Kjeldsen.
2018imi nersornaatit
Koda Awards 2018imi nersornaatit marluk agguaanneqassapput. 2018imi nersorsaatit marluupput, Ataqqinaammillu 2018imi nersornaat ataasiullunni.
Ukioq manna Koda Awards nersornaaserneqartussatut piukkussat ukuupput:
Ukioq 2018imi Nersornaat
- Tiu, saqqummersitaa ’Nuunneq’
- F (Frederik Elsner) saqqummersitaa: ’ Katassinnaanngisaq’
- Atsinnermiut (saqqummersitaq taaguuteqanngilaq)
Tamatuma saniatigut immikkut ittumik nipilersortartumut imaluunniit nipilersoqatigiinnut kalaallit nipilersugaannut immikkut ittumik sunniuteqarsimasumut/-nut Ataqqinaammik nersornaasiisoqassaaq.
