Koda-mi ilaasortaanerit imaluunniit qanoq ilaasortaanngorsinnaaneq pillugu apeqqutissaqarpit? Imaluunniit tusarnaartitsisimanerup sulialluunniit qanoq nalunaarutigisinnaanerat pillugu? Taava Koda-p siunnersortaa, Inunnguaq Petrussen, apeqqutit Koda-mut tunngasut suulluunniit pillugit attavigisinnaavat.
Koda-p Kalaallit Nunaanni siunnersortaa, Inunnguaq Petrussen nammineq erinarsuusiortartuuvoq erinniortarlunilu, taamaalillunilu ilaasortat akornanni apeqqutit pingaartinneqartut ilisimalluarlugit:
"Kalaallit Nunaanni Koda-mut ukiuni kingullerni marlunni siunnersortaavunga, inuillu amerlasuut attaviginissara pikkoriffigillualernikuuaat. Arlallit ilaasortaaneq, tapiiffigineqarnissamut periarfissat, ’Mit Koda’ minnerunngitsumillu akiliutissat pillugit apeqqutissaqartarput", Inunnguaq Petrussen oqaluttuarpoq.
Koda-p Kalaallit Nunaanni kulturimut aningaasaliuttagai
Martsimi Gramexip Kalaallit Nunaannut aningaasaliuttagaanik qinnuteqartoqarsinnaavoq, junimilu Koda-p Kalaallit Nunaanni kulturimut aningaasaliuttagaanik qinnuteqartoqarsinnaavoq, tamatumanilu Inunnguaq aammattaaq siunnersuilluni ikiuussinnaavoq:
"Saaffiginnissutit amerlanerit tapiiffigineqarnissamut periarfissanut tunngasuupput, tamatumanilu periarfissat pillugit paasissutissiisinnaavunga, taamatullu qinnuteqartunit Koda-mit piumasaqaataasartut pillugit. Ilaatigut internet-ikkut qinnuteqaatit immersornissaat, qanorlu paasissutissat pisariaqartut pissarsiarineqarsinnaanerat pillugit. Ilaasortat telefonikkut, emailikkut imaluunniit Facebook-ikkut attavigeriaannaavaannga. Qinnuteqartartut amerliartorput, Kalaallit Nunaannilu saqqummersitat amerlanerpaat ilaatigut Koda-mit taperserneqarlutik piviusunngornikuupput. Tamanna nuannaarutigeqaarput, pikkorissorpassuit tunitsivigisinnaasaat annertunngeqimmat, nipilersukkanillu saqqummersitsinissamut periarfissat ikittuinnaallutik", Inunnguaq nangippoq.
’Mit Koda’-mik atuineq
Ilaasortatut ’Mit Koda’ aqqutigalugu Koda pisariaqartunik tamanik paasissutissinneqarsinnaavoq, tassuunakkullu qularnaarneqassalluni, nipilersuusiat atorneqaraangata akiliisoqartarnissaa, tamatumanilu Inunnguaq ikiuussinnaavoq:
"Ilungersuutigalugu ilaasortat kaammattortarpakka ’Mit Koda’ atortaqqullugu, ’Mit Koda’-millu atuinermi periarfissanik oqaluttuuttarlugit. Aamma ’Mit Koda’-mik ikiorsertinniarunik tamatigut attavigeriaannaavaanngaa", Inunnguaq oqarpoq.
Saaffiginnittartut amerliartorput
Piffissami kingulliunerusumi saaffiginnissutit amerleriarnikooqaat, tamannalu qujanarpoq. Koda Awards nuna tamakkerlugu KNR TV-kut aallakaatinneqarpoq, tamatumalu nassataraa saaffiginnissutit amerleriarnerat: "Attaviginissara ajornanngeqaaq, ilaasortanullu kalaallinut iluaqutaasinnaaqaaq Koda attavigisinnaagamikku namminneq oqaatsitik atorlugit, akunnernik sisamanik nikinganertaqanngitsumik telefonernermullu aningaartuutaaruluunngitsumik", Inunnguaq Petrussen naggasiivoq.
Inunnguamut apeqqutit naatsukullaat pingasut:
Nipilersukkanik illit suut tusarnaartarpigit?
Nammineq Vinyl/LP-t suulluunniit tusarnaartarpakka. Mekaniskiusup kaavittup misigisinnaanerata, nipilersukkat tiguartiffiginissaat uannut kajuminnarnerulersittarpaa, nipilersukkallu nalinginnaasumik tusarnaartanngisama tusarnaarnissaannut piumassuseqarnerulersittarlunga. Taamaammat imminut periarfissittarpunga nipilersukkanik nutaanik tusarnaartuarnissamut. Siusinnerusukkut meeraaninniilli tusarnaartakkakka ”taakkutoqqat” tusarnaarnerusaraluarpakka. Uannut Bob Marley nr. 1-iuvoq, aamma Aalut, John Mayer aamma System of a Down suli tusarnaartuartarpakka. Nipilersukkatigut silarsuannut nutaamut ilaapput Radiohead aamma Tom Waits, taakkualu nuusiaat tamaasa maanna katersorniarsarivakka.
Nipilersornikkut suliniutit suut illit nammineq maanna aalluppigit?
Nipilersoqatigiillu INUK albummiliarput 2015 naalersoq saqqummerpoq, sapaatip-akunnerisa naaneri tamangajaasa suli tusarnaartitsissutigisarlugillu nipilersuutigisarpagut. Albummiliatta pingajuat aasaru immiutissavarput, qilanaareqaarpullu.
Nipilersornikkut misigisat annerpaaq sunaava?
Siullermik nuusiatta kingulliup iluatsilluarnera tamarmiusoq, illoqarfippassuillu nipilersorifigisavut - puigunaalluinnarput. Kisianni immikkut illuinnarpoq aasaq Tivolimi Plænimi nipilersoratta. Uannut nalinginnaavoq nipilersoqatigiilluartillunilu torrallaaruloortilluni, malugissutsit tamarmik tammartuusisartut, pikkunaqqinnaamik pissusilersorluni pisorlu nuannerluinnartoq silarsuarilerlugu. Misigissuseq tamanna nipilersoqatigiikkaangatta anguniartarpara, qaqutiguinnarli angusarlugu.
Inunnguaq attavigiuk
Inunnguaq ullut tamaasa apeqqutivit akinissaanut piareersimasarpoq. Saniatigut aamma soorunami mailikkut tamatigut attavigisinnaavat. ’Mit Koda’-mut, ilaasortaanermut imaluunniit piginnittussaatitaanermut tunngatillugu apeqqutit suulluunniit akisinnaanerisa saniatigut, aammattaaq Inunnguaq tassaavoq Kalaallit Nunaanni Koda-p kulturimut aningaasaliuttagaanik suliaqartuusoq. Quppernerup uuma saneraani attavissat takusinnaavatit.
