– nipilerinermik immikkut sammisaqarluni ilinniagaq, elektroniskiusumik nipilersornermik suliamut tunngavissiivoq
Da Bartali Crew tassaavoq erinniortup erinarsuusiortartullu Hans-Ole Amossenip nipilersornikkut suliami ilaanni nipilersoqatigiivisa atia. Ikinngutini marluk, Kasper Mathiesen (Synthesizer, guitar) aamma Ove Mørch (tumerparpaat), peqatigalugit electro house, hip hop aamma ambient aallaavigalugit suliaqarpoq.
Fotograf: Dida G. Heilmann
Da Bartali Crew 2012-imi Hans-Ole Amossenimit pilersinneqarpoq. Eventteknikeritut 2016-imi naammassillugu ilinniarnerata Hans-Ole Amossen aammattaaq nipilerineq aamma MIDI-teknologii pillugit ilisimasaqarlualersippaa, tamannalu ilaatigut Da Bartali Crew-imik suliaqarnera tunngavissilluarpaa:
”Elektroniskimik nipilersuusiorpugut, sunik tamanik akuugaasumik, Kalaallit Nunaannilu taamaatut nipilersuusiornermik siullersaavugut. Ataatsimut isigalugu Kalaallit Nunaanni elektroniskimik nipilersorneq nalinginnaavallaanngilaq – tamanit alutorineqartartunik soqarpianngilaq, saqqummersitaanngitsuunerusaramik. Electromik atuisartut dj-tut saqquminerusarput. Uagulli periuseraarput live-mik nipilersortarneq. Tumerparpaat, guitarit, synthesizerit piviusut atortarpagut, annerpaamik ’live’-unissaa anguniarlugu. Eventteknikeritut Frederikshavnimi ilinniarnikuuvunga, nipilerinermik immikkut ilinniagaqarlunga, ilisimasakkalu atortarpakka uanga nammineq nipilersoriaatsinnik pilersitsinermut, tamannalu tassaavoq immikkut ittoq. Oqartoqarsinnaavcoq periuserput teoriinut attuumasorujussuusoq”, Hans-Ole Amossen oqaluttuarpoq.
2016 ’live’-mik tusarnaartitsinernik ilisarnaateqarpoq maannalu saqqummersitsinissat tullinnguupput
”Live-mik 2016-imi annertuumik nipilersortarpugut, tassanilu pimoorullugu aallartilluta. 2012-imi Da Bartali Crew kisermaappara, dj-tullu nipilersukulallunga, nammineq nipilersuusiakka atorlugit. Kisianni tamanna unamminartoqarpianngilaq, taamaammallu live-mik nipilersorneq aallutilerpara, ikinngutikkalu marluk Kasper Mathiesen aamma Ove Mørch suliamut peqatiseralugit’, Hans-Ole Amossen oqarpoq, nangillunilu: ’Uanga tamatigut allallungalu, erinniartuullungalu programmeeriisuusarpunga, ikinngutikkali nipilersoqatigiinni nipilersoqatigiumasarlugit, tamanna nuannernerummat. Taamaaliornikkut aamma nikerartitsineq ajornannginnerusarpoq, ilakka namminneq nipilersoriaaseqarmata, ungalu namminerisannik nipilersoriaaseqarlunga, taamaalilluta anersaaq alla pilersittarparput. Allanneq ataasiuvoq, allanilli nipilersoqateqaraangama, misigissutsit allat pikialaalersarput”.
”Aallaqqaasiullugu ep saqummersinniarlugu suliniutigivarput, albummi aallaqqaasiutigissallugu annertuallaarmat. Neriuppunga ukiup affaata tulliuttup ingerlanerani saqqummiiumaarluta, taannalu ITunes-imiikkumaarpoq”.
Kalaallit Nunaanni nipilersornermik inuutissarsiuteqarnissaq ajornakusoortoq
”Kalaallit Nunaanni nipilersornermik inuutissarsiutitaarnissaq ajornakusoorpoq, saqqummersitaqanngikkaanni, tusarnaartuusinnaasutigullu tunngaviit annertunngeqaat. Kalaallit Nunaannilu nipilersukulavallaarutta tusarnaartartut qatsutsissavaatigut. Taamaammat inuit soqutiginnillualerseqqaagassaapput. Tamatumanilu inooqatigiinnikkut tusagassiissutaasartut atorluartarpagut. Immikkut nittarsaassissuteqanngilagut, kisiannili inooqatigiinnikkut tusagassiissutaasartut atorluartarlugit, tamannalu uagutsinnut ajunngivippoq”, Hans-Ole Amossen oqarpoq.
Oqaluttuaq kiinarpaat tunuliaqutarisaat
Da Bartali Crew-ip nipilersoqatigiittut assinganni takuneqarsinnaapput Hans-Ole, Kasper aamma Ove tupilliatut kiinarpaqartut, kissaatigaallumi ajornanngippat taama kiinarpaqarlutik saqqummertarnissartik:
’Kiinarpaat tupilaapput. Qanga angakkut tupillisarput, akeqqatik tatamisinniarlugit aallartikkaminnik. Aamma utertoorutigineqarsinnaapput, tupillisaq pissaaneqarluartillugu, taamaalilluni takorluukkamiit allaanerujussuarmik pisoqarsinnaavoq. Kiinarpaat atukkatta siunertaraa, tupilak ersisaarutaammat, atoraangatsigillu pilersitsisaratta. Takorloorparput kiiinarpaqarluta saqqummertarnissarput. Arlaannik sanatitseqqaaginnartussaavugut, atorlugit nipilersortarniassagatta, kisiannili aamma atorlugit erinarsorsinnaasariaqarpugut’, Hans-Ole Amossen oqaluttuarpoq.
Allanit isumassarsiorneq
Da Bartali Crew-ikkut ilaatigut Daft Punk, Puppetmastaz, Portishead aamma Mcmash Clan isumassarsiorfiginikuuaat, aammali kalaallit eqqumiitsuliortut isumassarsiorluarfiusarput:
”Ukiut ingerlanerini Mariinamit sunnigaalluarnikuuvunga, nipigeqimmat aamma Ole Kristiansenimit, taanna kalaaliuvoq rockimik nutaalianik 90-ernisanik erinniortartoq, allaaneroqisunik. 90-ikkunni nipilersugai ullutsinni suliaasimasinnaagaluarput. Daniel Lynge aamma sunnertiffiginikooqaara, aamma taarusuppakka Zikazakkut, rockertartut kimeqarluartut”, Hans-Ole Amossen oqaluttuarpoq.
Aavataaniit nipilersortunik atuineq nipilersorfimmi pikialaartitsilluartarpoq
Da Bartali Crew arlaleriarlutik tusarnaartitsinerni avataaneersunik atuisarsimapput, soorlu hip hoppertartut tusaamasat, Nuuk Posse:
”Nuuk Posse-p peqatigisarneranut pissutaasut ilagaat, Kalaallit Nunaanni rap-ertarnerup aamma hip hop-ertarnerup iluani siullernut ilaammata, ilutigisaanillu ullumikkut periuseq atorlugu rap-ertarmata. Inunnit ilisimaneqarluarput, oqaluttuassartaqarput, tamatumalu nassatarisarpaa tusarnaartitsinitta soqutigineqarluarnerat. Aamma arnat erinarsortartut pikkorinnerit ilaat rap-ertillugit atortarnikuuakka. Tunngaviatigut arnanik rap-ertartoqanngilagut, taamaammat tupaallaataasarpoq, arnat erinarsortartut pikkorinnersatta ilaat isiginnaartitsisarfimmi rap-ertileraangakkit. Ilaatigut erinarsortorinikuuakka Nina Kreutzmann Jørgensen. Kimmernaq Kjeldsen aamma Pilu Noahsen, december 2016-imi tusarnaartitsisarninni ilaasut”, Hans-Ole Amossen oqarpoq.
Rap-ertartunut inuusuttunut nutaanut periarfissiineq
”Kalaallit inuusuttut rap-ertartut assut suleqatigerusuppakka, aammalu rap-ertartut inuusuttut suli saqqummersitsisimanngitsut suleqatigerusullugit. Taamaaliornikkut aamma siumut alloriarnissaannut ikiorsinnaavakka. Maani scenerujussuarmi misiliisinnaapput, tusarnaartut saallugit. Taamaaliornikkut uanga ingerlatitseqqissinnaavunga, tamannalu assut pingaartippara”, Hans-Ole Amossen nangippoq.
Da Bartali Crew aamma Torluut!
Da Bartali Crew Hans-Ole Amossenip nipilersornikkut suliniutituarinngilaa. Suliniutaata aappaa, Torluut! allaanerulaarpoq Undergrunds-bandi Torluut!, 2008-mi aallartittoq rockip sakkortunersaanik misileraanissamut sammineruvoq, nalinginnaavallaallu soqutiginngilluaasarlugit – nipilersorfik suut tamarmik akuerisaaffiat paquminartoqarfiunngitsoq.
”Neriunarpoq ukioq manna Torluut!-miit nutaarsiassaqassasoq. Ukiut arfinillit kingulliit ingerlataqarnikuuvugut. Aamma nipilersoqatigiinnik taakkunannga live-mik nipilersortarpugut, tamatumanilu uanga nammineq nipilersortartut katersorpakka, nipilersoqatigisarlugillu”, Hans-Ole Amossen oqarpoq, aammalu nipilersukkat Kalaallit Nunaata avataanut anngunnissaat takorloorlugu: ”Aporfiuvoq inersimasuugattamere eksperimenterende dele af rockens hårde sider og et allergi for det banale. Et musisk sted, hvor alt er lovligt og intet er tabu. – sulisariaqarpugut akisussaaffeqarlutalu. Angalaqattaarneq ajornakusoortuuvoq, akisoqigami. Kalaallit Nunaata avataanukarusukkaluarpugut, soorlu Skandinaviami Canadamilu festivalinut il.il. Taamaammat siunissami kissaaataavoq Kalaallit Nunaat qimalaarlugu nipilersornissaq”, Hans-Ole Amossen naggasiivoq.
