Kodamiit aningaasarsiassatit arajutsissanngikkukkit siusissukkut erinaatitit nalunaarsukkit

Saqqummersitsinnginninni tusarnaartitsinnginniluunniit erinaatitit nalunaarsorsimanngikkukkit Kodamiit aningaasarsiassatit annaasinnaavatit. Erinaatitit Kodamut nalunaarsoqqareerpata massakkut iliuuseqartariaqanngilatit. Eqqaamagiulli saqqummersitsinnginninni tusarnaartitsinnginninnilu erinnat nalunaarsoqqaarnissai.

 

 

Erinaq Kodamut nalunaarutigineqarsimanngippat aningaasarsissutigisinnaanngilatit.

Massakkorpiaq Koda 20 million kruuningajannik uninngasuuteqarpoq agguaanneqarsinnaanngitsunik. Pissutaavorlu ilaasortaatitatta piffissaq eqqorlugu erinaatiminnik nalunaarsuinngitsoorsimasarnerat, appisimaarneqareersimagaluartullu aningaasartai Kodap inuttassaannut tunniussinnaanagit.

Digitalitut saqqummersitsinermi piffissaq aalajangersimasuinnarmi Kodap aningaasartassai qinnutigisinnaasarpai, taamaattumik sioqqutsillutit erinaatitit nalunaarsorsimanngikkukkit aningaasarpaalunnik annaasaqarsinnaavutit.

Saqqumminnginnerani ullut 14-it sioqqullugit nalunaarutigiuk

Innersuussutigivarput erinaativit appisimaarneqannginnerini aamma saqqumminnginnerini ullut 14-it sioqqullugit nalunaarutigereernissai. Taamatut iliornikkut qulakkiissavat aningaasarsiassavit annertussusai eqqortut illit konkunnut sukkanerpaamik nuunneqarsinnaanissai.

Qanoq erinaatikka nalunaarsorsinnaavakka

Mit Koda-mut iserlutit toqqagassat akkornanni ”Registrér værk” iserfigeriarlugu erinaatitit nalunaarsorsinnaavatit.

Kingusinnerpaamik qaqugukkut erinnat nalunaarsorsinnaavakka?

Kodap innersuussutigivaa saqqummersitsinnginnermi appisimaannginnermilu ullut 14-t sioqqullugit erinnat nutaat nalunaarsorneqareernissaat. 

Kodap erinnat nalunaarsorneqareernikuinnaat aningaasarsititsissutigisinnaavai. Appisimaarneqarsimasutut nalunaarutigineqarsimanera sioqqullugu erinaq nalunaarsoreersimappat Kodap aningaasarsititsipallassinnaanini qulakkiissavaa.

Saqqummersitsineq sioqqullugu nalunaarsuisimanngikkuma susoqassava?

Erinnat Kodamut nalunaarsorneqarsimanngippata aningaasartassai tunniussinnaanngilagut.

Piffissaq sioqqullugu erinaatitit nalunaarsorsimanngikkukkit Kodamiit aningaasarsiassappit ilai annaasinnaavatit. Digitalitut saqqummersitsivinni Kodap aningaasanik piumasaqarsinnaatitaanera piffissami killilimmi taamaallaat pisarpoq. Saqqummerfiusuni allaanerusuni ilaasortat aningaasarsiassatut toqqortaat ukiut pingasut qaangiukkaangata pisoqaavallaalertarput.