Taakkuupput Kalaallit Nunaanni hiphoppertartut siullersaat, Koda Greenland awardsimillu ataqqinaammik nersornaaserneqaqqammersut. ’Sulili nipilersorusunneq pigaarput, naak nipilersoqatitta ilaat siorna alianaqisumik annaangaluarlutigu’, erinarsuusiortartoq John Olsen oqaluttuarpoq.
31 januar, Nuummi Imernalaaq festivaleqarnerani Koda Greenland Awardsimik ataqqinaammik nersornaaserneqarpusi. Qanoq ippa, aamma qanoq nalliuttorsiorpisiuk?
Assorsuaq tupaallatsinneqarpugut, aammali nuannaaqaagut. Taamatut nersornaaserneqarneq imaannaanngeqaaq, nuanneqaarlu akuerineqarluni. Nersornaatisereeratta Tuttumukaavugut, ajoraluartumilli Peter peqataanngilaq, Danmarkimi kursuserami.
Ataqqinaaserneqarnermut ilaapput aningaasat 30.000 kr. Sumut atorniarpisigit?
Masterbånditoqqat nassaareqqippavut, taakku digitalisererniarpavut, siunissamilu tusarnaartitsisarnissanut atortarniarlutigit. Peter attavigissaaqimmat atorluarlugit suliarinerini ikiorumaarpaatigut.
Sooruna hiphopimik nipilersornerpiaq ilissi taamani tiguartiffigigissi?
Elektric boogimik aamma break dancemik 1984 qitittalerpugut. Kingornalu tamatta immikkut rappimik nipilersornermik pinnguartaqattaartariarluta, Peter, Henrik uangalu nipilersoqatigiiliorniarluta isumaqatigiippugut. Aatsaalli Andreas Larsilu 1991-mi peqatigisaleratsigit aallartilluarpugut, tusarnaartitsisarluta demobåndimillu Piitakkunni immiussilluta. Ukioq ataaserlu qaangiummat saqqummersitarput siulleq suliarivarput ”Sussa Appinnagu”
Nuuk Posse ullumikkut qanoq nipilersukulatigaat?
Siorna hiphop nunatsinni ukiunik 30-ngortorsiorlugu kulturip illorsuani Katuami nipilersorpugut, tupassutigeqaarpullu taama amerlatigisut erinarsuusiatsinnik erinarsoqataasinnaammata. Nalunngikkaluarparput inuit siornatigut nalunngilluaraatigut, aammali meeqqanik inuusuttunillu akoqarput, siornatigut uatsinnik tusarnikuunngitsunik, atortakkatsinnillu ilinniarnikuunngitsunik. Nuanneqaaq, tusarnaartitsineq naammat Facebookikkut likeserpassuarsivugut. Tamatuma kingorna aaqqissuussanut angisoorsuarnut marlussunnut qaaqqusaavugut, neriuppugullu iluatissasut.
Henrik Broberg kræfteqarluni siorna toquvoq. Tamanna qanoq ilissinnut sunniuteqarpa?
Napparsimalersimasoq tusaratsigu tupannaqaaq, sukkasuumillu piartorpoq. Toqunerata tamatta sakkortuumik sunnerpaatigut, immaqa Piitamut ajornerpaavoq, tassami Piitaq Henrillu meeraaqatigiinnikuungamik. Uatsinnut nipilersoqatigiit sinnerinut pingaaruteqarpoq Henriup eqqaaneqarnerata ataqqinartuutinnissaa, taamaattumik tusarnaartitsileratta Henriup ilaqutai Katuamut qaaqquvavut, eqqaaniarlugulu erinarsorluta.
Nipilersugassiortarneq immiussisarnerlu pillugit siunissami qanoq pilersaaruteqarpisi?
Siorna tusarnaartitsereeratta eqqartorparput nutaanik erinarsuusiorniarluta. Aallartisakannereerpugut tumerparpaamut beatsinik taallanillu nutaanik suliaqarluta, kisianni suli naammassineqanngillat. Eqqartorparput immaqa erinarsuutinik marlussunnik suliaqaannartassalluta, taakkulu saqqummersittarlugit albummerujussuarmik immiussinissatsinnut utaqqeqqaarata.
Taalliatit sumit isumassarsiffigisarpigit?
Maannakkorpiaq soqutigisakka allattarpakka, taamaattuaannarnikuuvungalu. Assigiinngissutaa tassaavoq maanna pisut itinerusumik eqqarsaatigisalerakkit, inuusunneruninnut naleqqiullunga, taamani sorraannerullungalu tassanngaannariataartarpunga. Ullumikkut taalliakka tassaanerupput nunarput ataatsimooruffigisariaqaripput siunissarput pillugu, ilinniagaqarnissallu pingaaruteqassusia. Naluarali, qanoq inerneqarumaarnersut saqqummersitsileriarutta, immaqa taallat ilaat atorusunnerussavakka allaniit. Pissanganassaaq taamanikkornissaanut sunik saqqummiussaqarumaarnersunga.
Hiphoppertarneq Kalaallit Nunaanni qanoq ullumikkut siaruaassimatigaa?
Inuusuttorpassuupput angerlarsimaffimminni computerikkut rappimik immiussisartut. Ilaallu pitsaaviusarput, taamaattumik qularinngilara hiphoppip nunatsinni siunissaqarluarnera. Tusaamavara nutaarpassuit martsimi tusarnaartitsissamaartut, pissanganassaarlu. Uanga nammineq erneqarpunga 16-nik ukiulimmik rappimik soqutigisaqartorujussuarmik. Tusarnaartuartarpai beatsiliullaqqeqalunilu. Naamineerluni aallartereerpoq, tamannalu nuannareqaara. Immaqa siunissami rappertartutsialassuanngussaaq, nuannissangaluarpoq arlaanni appisimaaqatigilaarsinnaasuugaanni.
Canadami Europamilu arlaleriarlusi appasimaartarsimavusi, kisiannili Danmarkimiunngitsoq, taamaasiunngisaannassavisi?
Marlussoriarluta periarfissaqarnikuuvugut, kisianni iluatsinngisaannarpoq, immaqa allanik ulapputeqarpallaarsimavugut, piffissaaruttarlutalu. Danmarkimili nipilersornissarput takorloortuaannarparput, neriuppugullu ’Grønland i Tivolimi’ appisimaarsinnaassalluta ukioq manna.
Nuuk Posse-mut paasissutissat:
- 1985-imi aallartipput, aatsaalli 1991-mi Nuuk Posse-mik ateqalerput. Kalaallit Nunaanni hip-hop-ertartut siullersaraat, kalaallisut, tuluttut danskisullu erinarsortarput.
- Nipilersoqataasartut tassaapput Andreas Højgaard (human beatbox), Lars Sørensen (rap), Peter Motzfeldt (rap aamma nipilersuutit), Thomas Hansen (rap) aamma John Olsen (rap og taallallu)
- Nipilersoqatigiit saqqummersitseqqaarput single-mik SUSSA APPINNAGU", 1992-mi, 1995-milu albummi NP saqqummerpoq. Ukioq qaangiummat nunarsuaq tamaat torralataat KAATAQ, saqqummerpoq, Belgiamiut label Subrosa saqqummersitsisoralugit.
- Nuuk Posse tusarnaartitsiartortarsimapput nunanut assigiinngitsunut, soorlu Sverige, Tyskland, Belgien, Canadalu, Danmarkimili naamik. Namminersornerullutik Oqartussat kulturikkut suliniuteqarluarsimasunut nersornaataanik 1995-mi tunineqarput, Messengers of Truth” –mullu FN-imit 2004-mi innersuunneqarlutik. 31 januar 2015 nipilersoqatigiit Koda Greenland Awardsimik ataqqinaammik nersornaaserneqarput.
