Uyarakq (Aqqalu Engell) isumalluarnartoq 2013-2014-mut nersornaaserneqarpoq, saqqummersitaanut Raatiu Nukik. Ass: I. Kriegel.
Katsi Kleist aamma Nanook nersorneqarput Koda Greenland Awards nersornaasiimmat
Arfininngornerup unnukkuani Kalaallit Nunaanni nipilersornersuaqarpoq, Nuummi Imernalaaq Festival peqatigalugu Koda Greenland nersornaatinik agguaammat. Ukioq ataaseq unitsiareerluni kalaallinut ilaasortanut arlalissuarnut ukioq manna nersornaasiisoqarpoq, tassa 2013-mi nersugassat ilanngunneqarmata. Innersuunneqartuni nersornaaserneqartut maanngaanniit pilluaqqorujussuarpavut!
Ukioq manna Koda Greenland Awards-tinik tunniussineq Kulturip Illorsuani Katuami pivoq, nuannisaartoqaqaarlu, Imernalaaq festivalertoqarnerani Koda Greenland Awards tunniunneqarmata.
”Ukioq ataaseq uninngatsiareerluni Koda Greenland Awards uteqqimmat nuannaareqaara, ilaasortavullu kalaallit naleqqulluartumik nittarsaalluarneqarmata. Nipilersortarneq pilluarit, minnerunngitsumik innersuunneqartuni nersornaaserneqartut pilluaritsi, qilanaarpunga ukiup ingerlanerani malinnaaffiginissassinnut”, taama oqarpoq Anne Sophie Gersdorff Schrøder, Saqqummersitsisartunik ilaasortanillu sullissinermut pisortaq.
Koda Greenland Awards 2014 nersornaaserneqartut
- 2014-mi saqqummersitani pitsaanerpaatut nersorneqarput nukariit Frederik aamma Christian Elsner, Nanook-milu nipilersoqataat, saqqummersitaannut ’pissaaneqaqisut’.
- 2013-mi pitsaanerpaatut – Katsi Kleist, saqqummersitaanut ’qujanaq’.
- Ataqqinaatit saniasigut nersornaatisisut tamarmik 30.000,- kr-ninnapput.
- Isumalluarnartoq 2013-2014 - Uyarakq (Aqqalu Engell) saqqummersitaanut Raatiu Nukik
- Koda Greenland Awardsit aamma ataqqinaammik nersornaatitaqarput. Tassuminnga nersorneqartarput ’ maligassiuisut, erinniornerup, erinarsuusiornerup nunatsinnilu nipilersornerup iluani maligassiuisut immikkullu nersortariallit”. Ataqqinaammik nersornaaserneqarput hiphoppertartut Nuuk Posse, 1984-mi rap-imik torrallaaqalutik nunatsinnut eqqussisut
Isumalluarnartumut aamma ataqqinaammut nersornaasiisarnissat ukioq allortarlugu pisalissaaq, taakku paarlakaatsillugit, tamarmillu aamma 30.000 kr-nik aningaasartaqassapput.
Koda Greenland Awards Kalaallit Nunaanni Kodap aamma Kalaallit Nunaanni nipilersortartut kattuffiata suleqatigiinnerisigut ingerlanneqarpoq 31. januar, 2015.