Fotograf: Patrick Abrahamsen
Avannaamioqatigiit majimi festivaalianni nutaami, Frigg Festivalimi, kalaallit pissanganartunik peqataatitaqassapput. Small Times Giants, Rasmus Lyberth aamma Nanook tassaapput kalaallit nipilersoqatigiivi Frigg Festivalenimut, Kongens Havemi, Københavnimiittumi, weekendimi 9-10 majimi pisussami, peqataaqqullugit qaaqquneqartut.
2014-mi upernaakkut Frigg Festival siullermeersumik ingerlanneqassaaq. Frigg Festival tassaavoq nipilersornikkut kulturikkullu festivaali nutaarluinnaq immikkuullarissoq Københavnimi Kongens Havemi ingerlanneqartussaq. Ilisarisimaneqarluartunik nuannerineqarluartunillu danskinik, kalaallinik, islandimiunik, savalimmiormiunillu peqataasoqarluni nipilersornikkut inuinnartut nuannannersuaqarnissaa maannakkorpiaq piareersarneqarpoq, festivalip siullerpaamik ulluni 9 aamma 10 maj ingerlanneqarnissaanut.
Festivaliliornissamik isumassarsiap tunngavigaa nunanit atlantikup avannaaneersunit nipilersukkanik nuannersunik tusarnaartitsinissaq, avannaamioqatigiit kulturiannik nerisassaataannillu pissanganartunik akoorneqartussaq. Siunertaavoq inuppassuarnik Avannaamioqatigeersunit katerisimaartitsinissaq, festivaaleqataasut – nipilersornerit katersuuffiginerisa saniasigut – nunat avannarlermiut ataatsimoorussaminnik kulturiannik aamma ikinngutigiinnerannik, nunat taakku akornanniittuarsimasumik, eqiteruffigineqartussamik.
Small Time Giants, siorna Kodap isumallunartunut nersornaasiuttagaannik nersornaaserneqarput nipilersoriaatsimi periutsinik nutaanik aqqutissarsiullaqqinnerminnut, nipilersoriaatsimillu nutaamik ilisarisitsisarnerminnut, festivalimi peqataassutigissavaat nipilersoriaasertik post-rockimik sunnerneqartumik nipilersorneq aamma toqqaannartumik saqqummiusseriaaseq nunarsuatsinni alutorineqarluartoq. Small Time Giants tassaapput erinarsortuat Miki Jensen, pattagiartoq guitarertorlu Pilunnguaq Hammeken, bassertoq Jakob Skovaa, tumerparpaartoq Jonas Lundsgaard Nilsson. Nipilersoqatigiit amerlanersaat kujataani Qaqortumeersuupput, nipilersoqatitaavalli Jonas Lundsgaard Nillson Jyllandip avaamiuuvoq.
Rasmus Lyberth aamma peqataassaaq. Erinarsortartoq, erinarsuusiortoq isiginnaartitsisartorlu kalaaleq 1970-ikkunnili kalaallit nunaanni nuannerineqarnerpaat inuinnarpalaarnerpaallu ilaat. Nipilersortarnermigut erinniortutullu eqqumiitsulioriaatsimigut avannaarsuata nunaa nunarsuatsinni tusarnaariartartunut ilisarisimatilerpaa, erinarsoriatsiminilu eqqumiitsuliortutut qulakkeerlugu Kalaallit Nunaata nuannerineqarnerpaat ilaannik eqqumiitsuliortutut sinniisoqalersimanera.
Kiisalu, minnerunngitsumillu, maanna Kalaallit Nunaani nipilersoqatigiinni nuannarineqarnerpaat ilaat, Nanook, peqataassapput. Nanook-ikkut pingaarnertut inuttarai nukariit Christian aamma Frederik K Elsner, 2005-imi immikkut maluginiarneqaqqaartut, naatsumik filmiliaminni Inuup Tarraa-ni.
Malitsiinnavillugu nipilersuusiortarnerat aallartivippoq, 2009-mi saqqummersitseqqaarput ”Seqinitta Qinngorpaatit” saqqummersikkamikku, seqinnerfigineqarnermik imaqartoq. CD ingerlaannaq Kalaallit Nunaanni aamma nunani allani radiukkut nuannarineqarnerpaanut ilaalerpoq, malitsigaalu ”Ai Ai”, nuannaarnerup nipaa, 2011-mi saqqummersoq. Nipilersoqatigiit maanna nuannarineqarnerpaanut ilaapput. Indie-rockimik nipilersortartuupput, pop-mik nalunngisaalluartunik akuttoqatigiissaarnertalinnik nipilersortarlutik. Taalliaat sakkortuujupput pinngortitaq assitalersuutitut atorlugu torralaasarlutik.
Nipilersoqatigiit tassaapput Christian aamma Frederik Elsner ( erinarsortut guitarertullu), Mads Røn (pattagiaq) Andreas Otto (bas) aamma Hans Rosenberg ( tumerparpaat)
Festival pillugu aamma peqataasussat allat pillugit paasiniaasinnaavutit uani:http://www.friggfestival.com/
