Kulturikkut illorsuaq Katuap inersuaaani arfininngormat Koda Awards ingerlanneqarpoq. Naja P Gustav Lynge Petrussen aamma Marius Petrussen ilagalugit saqqummersitartik ’Naasunnguusunga’ aallaavigalugu Ukiumut Nersornaasitinneqarput. Bent Ole Brandt Ataqqinaammik Nersornaasigaavoq.
1991mili Kodap kalaallit Nunaanni taalliortuuneq erinniortuunerlu nalliuttorsiutiginiarlugu immikkut ukiumoortumik nersornaasiisarneq ingerlappaa. Arfininngormat 18.februar pisartut siulii assigalugit tamanna nalliuttorsiutigineqarluni. Ukioq manna Koda Awards Hans Lynge Inersuaani ingerlanneqartoq Nathan Kreutzmann innersuunneqartut, inersuarmi peqataasut tvkkullu isiginnaartut unnup ingerlanerani malinnaatitsillaqqeqaluni ingerlatsisorineqarpoq. Nipilerortunik aqutsisoq Glenn Møller erinarsortartoq Kristine Heiselberg ingiorteralugu, pitsaaavissumik siornatigut Ataqqinaamik Nersornaaserneqarsimasut ataqqiniarlugit saqqummersitaannik aallaaveqartumik nipilersortoralugit unnuk nuanneqisumik sinaakkuserpaat.
Ukiumut Nersornaat 2022 Naja Pmut tunniunneqarpoq, Bent Ole Brandtilu Ataqqinaammik Nersornaaserneqarluni. Ukioq manna naliliisorineqarput KNRimiit Maali Hermansen, Katuamiit Jacob Søvndahl Skovaa, Nunatsinni Nipilersortartuniit Georg Olsen, Nipiaa Rock Festivalimiit Peter Klemann taavalu Laura Lennert Jensen (Koda sinniisussatut toqqagaq), ataatsimoorlutik ukiumut saqqummersitarpassuit aallaavigalugit nersornaaserneqartussanik aalajangiisuupput.
Ukiumut Nersornaat 2022
- Naja P: EP ”Naasunnguusunga”
Naasunnguusunga pillugu naliliisut ima tunngavilersuipput:
Naja P saqqummersitamini ”Naasunnguusunga”-mi takutippaa erinnioriaaseq allanartoq tiguartinnartorlu, kiisalu taallioriaasia sakkortooq eqqarsarnartoq sapiitsuliortorlu, aammali inuppassuit ummataannut eqquisoq.
Arnaq inuusuttoq, erinniortoq taalliortorlu nipilersukkamini erinagillunilu tusaqqoornartuliortoq suliai tusaqqaarlugit akunnattoornarsinnaasut tusaqqikkaannili pingajussaa ataavartumillunniit tusaaqqittariaqartuupput.
Taallat misigissutsit imaannaanngitsut oqaluttuarpalaartumik saqqummiunneqartut qiteralugit erinalersornerisalu saqqummersitat tamakkiisumik sinaakkuserpaat tusaruminartumik oqilisaaqataalluinnartumillu.
Ataqqinaammik Nersornaat 2022
- Bent Ole Brandt
Naliliisartut Bent Ole Brandtimik innersuussinerminni uku tunngavilersuutigaat:
Nunatsinni nunaqarfinni illoqarfinnilu katerittoqassatillugu nipilersortoqarnissaq qitiulluinnartarpoq – taamaattoqassatillugulu nipilerisut nipilersoqataasartullu amerlaqaat – suliaq nuannaralugu nunaqqatinut kulturikkut pisuunngortitsiuarnissaq qiteralugu suliaqartartut, tamaasa qutsatissaqarfigaangut.
Ukioq manna nipilersortartuunerup silarsuaani nipilersoqataasartut namminerisamik saqqummersitsinermikkut nuimalersimanngikkaluit nersorniarlugillusooq Naliliisartut Ataqqinaammik Nersornaasigassaminnik toqqaaasimapput.
Ataqqinaammik Nersornaasilingarput nuna tamakkerlugu nipilersortartorpassuit nipilersoqatigiinnarnagit sullittuarpai taamaammallu aamma ilisarisimannitserpassuaqarpoq amerlanerillu suleqatigiisitsillaqqissuunera ilisimavaat. Immiussinerni nipigissaasorinnissimasut taavalu produceritut sullissisorinnissimasut tamanna ilisarisinnaalluassajunnarsivaat.
Paaseqatigiisitsisinnaaneq suliassarlu qiteralugu suleqatigiisitsisinnaaneq ataqqinaataasa ilagilluinnassavaat.
Ukiorpassuarni nipilersortartutut saqqummersitani suleqataasarsimavoq immikkut maluginiagassaapput soorlu Issarnerit, Mariina. Aammalumi nipilersoqatigiinni assigiinngitsorpassuarni ilisarisimaneqarluarpoq. Soorlu aamma immiussani assigiinngitsuni saqqummersitserqataasutut nalunaarsoqqavoq – suleqataaneq qiteraa namminerisamilli saqquminiartuusimanani naak nipilersullaqqissuunini ilisimaneqaatigiinnarnagu ataqqineqaatigingaluaraa.
Sineriammi tusarnaartitsisarnerpassuit ilaaffigisarsimavai Qinngornerit, Issarnerit, Mariina aammalumi nipilersortigiippasuarni allani.
Nuna tamakkerlugu nipilersortartutut ilisarisimaneqaannarani nipilerisutut aamma suliai ataqqineqarluartaqaat, nipigissaallaqqimmallu nipigissaasorissallugu kissaatigineqakkajuttarpoq ulloq manna tikillugu.
Festivalini imikkut nipigissaasutut misilittagaqarluarnini ilaatigut takutippaa Aasiaat 250inngortorsiorluni ukiuani, Nipiaa Rock Festival piviusunngunngitsuulermat ullualunnguit atorlugit aaqqissuutipallammagu piviusunngornissaa taamaalilluni isumannaarlugu.
Piffissanngorsimavoq ataqqinaammik nersorneqarnissat, suliarisimasarpassuarnut qujanaq, taanna ataqqinaatingaat - Bent Ole Brandt.
Ukiumut Nersornaammut innersuunneqartut ukuupput:
- SIGU: ”Ujartaraat Qaamaneq”
- Naja P: EP ”Naasunnguusunga”
- Andachan: EP ”Seeyousoon”