Ukioq manna Koda Awards ingerlanneqarmat Don Maliko aamma Hans-Ole Amossen nersorniarneqarput

Don Maliko Ukioq Manna Nersornaammut qujavoq kiisalu Hans-Ole Amossen Piginnaanilimmut Nersornaammut qujalluni / Ass.: Aqqalunnguaq Heilmann

 

Sisimiuni Arctic Sounds-festivalimut atatillugu arfininngormat Koda Awards tunniunneqarput. Ukioq manna 2018imi saqqummersitat pillugit nersornaaserneqartup Don Malikop saniatigut Yenso kiisalu Nick Ørbæk aamma piukkunneqarput. Piginnaanilittut nersornaaserneqartup Hans-Ole Amossenip saniatigut aamma Sound of the Damned kiisalu Malu Rohmann tassunga piukkunneqarput.

Ukioq manna Koda Awards Sisimiuni kulturip illorsuani Taseralimmi tunniunneqarput, Arctic Sounds-festivalimullu atatillugu nuannattut Koda Awards tunniunneqarmata suli pikkutsannerupput.

Ukioq Manna Nersornaat 2019 – Don Maliko, albummi ’II’ pillugu

Kalaaleq rappertartoq Don Maliko (Malik Egede) 16inilli ukioqarluni saqqummersitsisarfik Sermit Records isumaqatigiissummik atsioqatigalugu albummi siulleq ’Sinnattupiluk’ saqqummersippaa ’Sinnattupiluk’ (2007). Don Malikop albummiliami aappaa ’II’ 2018imeersoq pillugu Ukioq Manna Nersornaammik tunineqarpoq. Dommerisut ataatsimiititaq imatut oqaasertaliivoq:

’Inuiaqatigiinni ajornartorsiutit annerpaat ilaat qaangerneqarsinnaapput - piumassuseqaraanni. Soorlu Don Malikop saqqummesitamini ’II’-mi erinarsuummi ’Ikumatitara’-mi hashimik atuiunnaarniarnini rapperluni erinarsorlunilu sammigaa. Siornatigut nuanniitsumik inuunerinikuusaq qulaarlugu avammut suaarutiginiaraanni nammineq inuttut sapiissuseqartariaqarpoq. Don Maliko rappertartuuvoq kisiannili samples tunngaviginagit nipilersortarami, nipilersugassiai nipilersoqatigiinnit nipilersorneqarsinnaasarput. Saqqummersitaa eqqarsaallannartoqarpoq kiisalu Don Maliko inuusuttuaraallunili tusaamasanngortoq inersimasunngorsimasoq tusaaneqarsinnaalluni’.

Albummi ’II’ pillugu iTunes allappoq: ’Kalaallisut streetrap malunnaateqarluartoq nipilersoriaasitoqqamik akulik’, albummilu pillugu Don Maliko nammineq oqarpoq:

’’II’ albummiliama aapparaa, taannalu digitaliinnarmik saqqummersinniarlugu aalajangernikuuvunga. Albummi 10nik erinarsuutitaqarpoq, tamaasalu nammineq immiussisarfinni immiunnikuuakka. Taallat assigiinngitsorpassuarnut sammisuupput, siornatigulli pinerluttarnikuunera ukiorpaalunnilu hashimik atornerluinikuunera annerusumik samminiarnikuullugit. Taallat ilaat ataaseq inuiaqatigiinnik isornartorsiuerpaluttuuvoq, ilumoorsaarnerulli saniatigut ilai aamma pillingajaarpalullutillu ilai oqqassaarerpaluttuupput. Erinarsuutit sivisuumik suliarinikuuakka, erinnat taallallu ilaat gymnasiamiillungali aallartinnikuullugit (2011-2014). Immiussama pitsaasuunissaat nutaaliorpaluttuunissaallu pingaartinnikuugakku piumasama anguniarnera artornarnikuuvoq, soorunalumi sivisunikuulluni’.

Piginnaanilimmut Nersornaat 2019 – Hans-Ole Amossen

Ukioq manna Piginnaanilimmut Nersornaat erinniortumut taalliortumullu Hans-Ole Amossenimut tunniunneqarpoq, taassuma ilaatigut 2012imi Da Bartali Crew pilersinnikuuaa. Eventteknikeritut ilinniarini 2016imi naammassisani aqqutigalugu nipit kiisalu MIDI teknologi pulaffiginikuugamigit, Hans-Ole Amossenip ilaatigut Da Bartali Crew ingerlanniarlugu taakkua iluaqutigai. Dommeisut ataatsimiititaq Hans-Ole Amossen pillugu imatut oqaaseqaateqarpoq:

’Nipilersortartut erinarsortartullu scenimi pikkusuttaqisut, erinniortoq tunuarsimaarluni malunnangingajattarpoq. Hans Ole Amossen siornatigut Torluut siuttuuffiginikuuaa maannalu Da Bartali Crew siuttuuffigalugu, tassanilu teknikkikkut atortut pissanganartumik atortarlugit. Taakkua nipilersugaannik taallanillu tusarnaartut eqqortillutik pikkutsattarput, taamaalillutillu Hans Ole Amossenip suliai iluarusuutigisarlugit’.