Ukioq manna Koda Awards ingerlanneqalerpat 2019imi Nersornaat kiisalu Piginnaanilimmut Nersornaat tunniunneqassapput

Arfininngorneq 20. april Kulturip Illorsuani Taseralimmi inersuarmi ukioq manna Koda Awards ingerlanneqassapput. Don Maliko, Yenso aamma Nick Ørbæk 2018imi saqqummersitatik pillugit ukioq manna nersornaammut piukkunneqarput. Sound of the Damned, Malu Rohmann kiisalu Hans-Ole Amossen ukioq manna Piginnaanilimmut Nersornaammut piukkunneqarput. 

Yenso ’Perserartoq’ pillugu

Foto: Dida G. Heilmann

 

Yenso tassaavoq erinniortoq taalliortorlu, Jens Ole Nathanielsen. Yenso piukkunneqarpoq saqqummmersitani ’Perserartoq’ pillugu, piukkunneqarnerlu Jens Ole Nathanielsenimut annertuumik sunniuteqarpoq: 

"Koda Awardsimit piukkunneqarnerma, suliariniagara naammassilluarsimaginga uppernarsarpaa. Saqqummersitara ’Perserartoq’ pillugu ukioq manna nersornaammut piukkeqarnera nuannaarutigaara. Nipilersoriaaseq Indie nikallungarpaluttutut tusaamaneqartoq malillugu saqqummersitaangaluarluni, erinnat tamarmik immikkuullarittuusut tusaaneqarsinnaavoq. Suliama maluginiarneqarnerat uannut pingaaruteqaqaaq." 

Albummi Atlantic Musicimit saqqummersinneqarpoq, taakkualu ilaatigut allapput: 

"Una Yensop saqqummersitaraa siullleq, taalliulernermiit ukiut arlallit qaangiuttut naammassineqartoq. Balladit qititassiat, rock erinnallu misigissuseqarpaluttut eqqumiitsuliatut saqqummiuppai, kiisalu Yenso qatittorsinnaalluarlunilu qataatsuaqqat sapinnginnamigit erinarsullaqqeqaaq. Soorlu Ole Kristiansen kiisalu Zikazami Siiva Fleischer inuusunnerminni nipaannut assigusumik nipittoraluarluni sallaappasittarnera immikkuullarissuuvoq. Piginnaanilik tusaaniarneqartariaqarpoq, erinarsugaalu sapernartuusarlutik. Patiffiit nuuttarneri nalinginnaasuunngillat, erinarsuutillu tusaallugit eqarnartunik tupaallannartunillu amerlasuunik akoqarlutik. Albummimik suliarilluakkamik maanilu sungiusimanngisatsinnik allaanerusumik nipilersortunik nuannarisalinnit ilassilluarneqassaqaaq." 

Koda Awards pingaaruteqarnerat pillugu Yenso nangippoq: 

"Nunatsinni ukiumoortumik Koda Awards ingerlanneqartarnerat nalitsinni pingaaruteqaqaaq. Tassanimi eqqumiitsuliortut piginnaanilit nittarsaanneqartarmata." 

Don Maliko albummi ’II’ pillugu 

Foto: Mads Phil

Kalaaleq rappertartoq Don Maliko 16iinnarnik ukioqarluni saqqummersitsivik Sermit Records isumaqatigiissummik atsioqatigaa, albummilu siulleq ’Sinnattupiluk’ (2007) saqqummersillugu. Ukioq Manna Nersornaammut Don Maliko piukkunneqarpoq aappasaassaatut albummiliani, 2018imeersoq ’II’ pillugu. Piukkunneqarneq aamma Don Maliko annertuumik pingaaruteqarpoq: 

"Pikkunneqarnera uannut pingaaruteqaqaaq. Ingammik maannakkut albummimiittut tamangajaasa nammineq suliarinikuugakkit – beatit, taallat immiussinerlu kingornalu mixerineq masteriliornerlu. Ukiut 10t matuma siorna, nipilersoqatigiit JoSPal-G ilagalugit Kodap Piginnaanilimmut Nersornaataanik tunineqarpugut, maannalu ukiut 10t saqqummersitsinngereerlunga kingumut piukkunneqartunut ilaanera nuannaarutigeqaara. Siullermik saqqummersitanniit pitsaanerusumik saqqummersitserusunnikuugama, nutaamik albummiliornera ilassilluarneqarmat qujamasuutigeqaara." 

Albummi ’II’ pillugu iTunes allapput: ’Tusaaniarneqarluartumik qanganisaangajattartumik kalaallisut streetrapperput’, albummilu pillugu Don Maliko nammineq oqarpoq: 

’"II’ albummiliama aapparaa, digitaliinnarmillu saqqummersinniarlugu aalajangernikuuara. Albummi erinnanik 10nik imaqarpoq, tamaasalu nammineq immiussivinni immiunnikuullugit. Taallat sorpassuarnut tunngagaluartut, siornatigut pinerluttartuullungalu hashimik atornerluinikuullunga, qanoq allanngortiginikuunera takutikkusussimavara. Taallami ataatsimi inuiaqatigiit pillugit isornartorsiuivunga, iluasaarpaluttulli saniatigut tissinakujuttunik peqqusaarpaluttunillu taallaqarput. Erinarsuutit sivisuumik suliarinikuuakka, erinniat taallallu ilaat gymnasiamiillungali (2011-2014) sanaarinikuullugit. Suliarilluakkamik nutaaliorpaluttumik nuannarisaqartuugama, nipilersornikkut siunniussama anguniarnera imaannaanngeqaaq soorunalumi sivisunikuulluni." 

Don Maliko Koda Awards qilanaarpoq: 

"Nipilersornerit pillugit nersornaasiisarnerit nipilersornermik sammisallit akornanni annertuumik sunniuteqarmata, Koda Awards eqqumiitsuliortutut uannut pingaaruteqaqaaq. Nersornaasiisarnerit eqqumiitsuliortut akornanni iluaqutaasumik unammillertoqalertarsoraara, tamatumalu kinguneranik nipilerukkanik suliarilluagaanerusunik saqqummersitsisoqartarluni. Koda Awards Kalaallit Nunaanni kisiartaalluni nipilersuusiortunik nersornaasiisarpoq, Kalaallit Nunaannilu nipilersornermut attuumassusilimmik sammisalinnut pingaaruteqaqaluni." 

Sound of the Damned – Piginnaanilimmut Nersornaammut piukkunneqartoq 

foto: Pani Enequist

 

Sound of the Damned tassaapput kalaallit sakkortuumik nipilersoriaaseq deathcore ilannguttarlugu nipilersortartut. Nipilersoqatigiit 2017imi aallartittut tassaapput Sebastian Enequist – Guitaarertoq ernarsortoq, Allarneq (Tuka) Nielsen Lyberth – Tumerparpaat, Herman Josefsen – bass, Josva Møller – Guitaarertoq kiisalu erinarsugassiortoq, Pani Enequist. Taallani sammineqartut erinarsuummiit erinarsuummut assigiinngiiaarput, taamaattorli itisuumik unneqqarippaluttumik erinarsuusiaapput, kamappalunnermik, nuannaarnermik asanninnermillu aamma oqariartuuteqarlutik. Sound of the Damned Piginnaanilimmut Nersornaammut piukkunneqarnerminni oqarput: 

"Piukkunneqarnerinnarluunniit uagut ataqqivarput pingaaruteqaqimmat’. Suli saqqummersitsinikuunnginnatta Koda Awards eqqarsaatiginikuunngikkaluaratsigit tupaallappugut. Piukkunneqarnerput kisianni tulluusimaarutigaarput neriulluarlutalu. Kalaallit Nunaanni nipilersortartut akuerineqarnissartik pisariaqartimmassuk, Koda Awards pingaaruteqaqaat – soorlumi Kalaallit Nunaanni The Grammy's. Taamatut nipilersoqatigiittut nipilersortartutullu akuerineqarluni aamma imminut tatiginerulernarpoq, taamaammat ukioq manna Koda Awards maani Sisimiuni ingerlanneqarnissaa tassa torrak, qilanaalereerpugut," Sound of the Damned oqaluttuarput. 

Malu Rohmann Fleischer – Piginnaanilimmut Nersornaammut piukkunneqarpoq 

Foto: Aká Hansen

Erinniortoq taalliortorlu Malu Rohmann Fleischer nipilersoriaatsit soul/jazz tuluttut erinarsorluni saqqummiisartoq, Piginnaanilimmut Nersornaammut piukkunneqarnini pillugu oqarpoq: 

"Piginnaanilimmut Nersornaammut piukkunneqarlunga tusarakku nuannaajallappunga, nipilersortartut piukkunneqartut ataqqeqigakkit. Maanna tamakkua sanillersorpakka." 

Koda Awards pingaaruteqaqaaq, Malu Rohmann Fleischer naggasiivoq: 

"Nunatsinni erinarsuusiortartut kikkuugaluartulluunniit maluginiarneqartarmata, KODA Awards Kalaallit Nunaannut pingaaruteqaqaaq. Nunatsinni nipilersortartorpassuaqarpoq assigiinngitsunik tunuliaqutalinnik oqaatsit assigiinngitsut atorlugit assigiinngitorujussuit pillugit erinarsortartunik, uangalu isumaqarpunga tamatta inissaqartariqartugut. Assersuutigalugu uanga tuluttut taalliortarpunga, Nunatsinnilu tuluttut erinarsuutit piumaneqarpianngikkaluartut piukkunneqarpunga. Kodap Kalaallit Nunaanni immikkoortortaa eqqumiitsuliortunik oqaatsit assigiinngitsut atorlugit erinarsortartunik piukkussaqaraangamik pingaarutilimmik ariartuuteqartarput, tassalu oqaatsit pineqaratik nipilersugassiorneq nipilersukkallu taakkunani qitiutinneqartut takutinneqartarpoq. Nunatsinni najugallit nipilersugassiaasa persuartigineqartarnerat Kalaallit Nunaannut pingaaruteqarpoq."