Nive Nielsen – Aallaqqaammut erinniorniarluni taalliorniarlunilu ersinakujuppoq

Assiliisoq: Filip van Roe

Kalaaleq erinniortoq taalliortoq erinarsortartorlu, Nive Nielsen, nipilersorneq isiginnaartitsinerlu oqimaaqatigiissaarlugit ingerlappai, nipilersoqatinilu ’The Deer Children’ nunatta avataani angusaqarluarsimapput.

Nivi Nielsen 23-it missaani ukioqarluni nipilersorneq aallutilerpaa, massakkullu 40-nik ukioqarluni. Kalaallit Nunaanni najugaqarpoq, massakkullu Danmarkimut peqqammerluni USA-mi nipilersorlutik angalareernerup kingorna.  Nive Nielsen visuel antropologimi mastereqarluni ilimagisimanngikkaluarpaa nipilersorneq inuunermini taamak annertutigisumik initutigilissasoq.

"Ataataga nipilersortartuuvoq, anaanagalu nipilersukkanik nuannarisaqartuulluni, taamaammat nipilersorneq inuuninniittuaannarnikuuvoq. Kisianni ataataga peroriartorfiginngilara, nipilersortartunngornissarali ilimagisimanngilluinnarpara. Politisk videnskab pillugu ilinniarninni pikkunaatsorsiornikooqaanga, taamaammat nipilersorneq aallutilerpara. Nalaatsornerinnarmik erinnioqattaalerpunga juullimi guitarimik tunisikkama, taamaammat sungiunniaqqaarsimavara. Amiilaarnangajapporluunniit aallaqqaammut, ilami ilimagisimanngilluinnarpara erinniorlungalu taalliortalissasunga. Sivisuumik ittoortupilussuugaluarpunga, aatsaallu piffissaq sivitsormat erinniakka inunnut tusaatittalerpakka. Massakkulli nipilersornerup arriitsumilli inuunera tiguarsimavaa, allamillu ukiuni qulini kingullerni suliaqarsimananga."

The Deer Children

Ukiuni kingullerni arlalinni nipilersoqatigiit ’The Deer Children’ nipilersoqatigisarsimavai. Nive Nielsen eqqaassanngikkaanni nipilersoqatigiit ukuupput: Jan de vroede, Charlie, Jeppe Skovbakke, Andrew Collberg, Joe Novelli, Salik Parbst Frederiksen aamma Nicolaj Brandt. The Childrenikkut nipilersoriaasiat ’Inuit indie’-mik immaqaluunniit ’grønlandsk folk pop’-mik taaneqakkajuttarpoq, kisianni Nive Nielsen aperissagaanni akikkajuttarpoq:

"Oqartarpunga nipilersoriaaserput  indie rock, folk, allanillu assigiinngitsunik akusaasoq, kisianni aap, aamma inuuvunga."

Suleriaaseq isumassarsiffigisaalu

2019-mi nipilersoqatigiit siullerpaamik saqqummersitsipput taasaminnik ’Nive Sings’. Tassanilu erinnat aqqaneq marluk tuluttoorput, pingasullu kalaallisut taallaqarlutik. Taallat arlallit quianakujuttuupput, saqqummersitamili taallat ilumoorsaarnerit, asanninnilikkersaarutit maqaasinermullu tunngasut ilaapput. Nive Nielsen nassuiaavoq isumassarsisarnini assigiinngitsuniit aallaaveqartoq:

"Isumassarsigaangama, ilaatigut pereersuniit aallaaveqarsinnaasarpoq, inuilluunniit nalunngisakka, immaqaluunniit suugaluarnersorluunniit puttuteriasaartoq. Suliama annersaa qamani arlaanni pigisanneersuusarpo. Ilaatigut erinaq takkuteriasaaginnarsinnaasarpoq, taava paasiniapallattarpara suunersoq. Amerlanertigut isumaa paasisarpara eqqarsaatigillattaarsimatillugu. Ilaatigut aamma inuuninni pisut pillugit toqqaannartumik taalliorsinnaasarpunga."

Nive Nielsen guitarertarput aamma ukulele-guitar, ukuleleviunngitsoq, guitariaq. Ilisarnaatigaalu guitareeqqamik aappaluttumik atuisarami:

"Erinniorlungalu taallioraangama guitarera nalinginnaasoq atukkajunnerusarpara, ilaatigullu guitariaraq tigusinnaasarlugu. Taannali aappaluttuaraq kisimi maluginiarneqartanngilaq aappaluttuunera piinnarlugu. Massakkut allamik pisaaqqammerpunga, elektrisk guitareq mikisoq."

Nivi erinniorniaraangami ingiinnarluni erinniorniarsarineq ajorpoq:

"Misilittareerpara ingillunga erinniorniarsaralunga, amerlanertigulli ajortarpoq, erinarlu iluamik nuannarivissorneq ajorpara. Nalinginnaasumik utaqqisarpara mannineq takkuttoqarsiillugu. Takkuttoqaraangalli suliakka tamaasa iperarlugit erinaq naammassiniarsarisarpara. Nalinginnaasumillu erinaq taallarluunniit takkuttoq, taava tuaviinnaq angerlapallattarpunga immiukkiartupallallugu. Imminut neriorsornikuuvunga arlaannik takkuttoqaraangat, qasugaluarumaluunniit unnuaannaagaluarpalluunniit makeriarlunga suliaripallattarniarlugu. Misigereerpara aamma timmisartumut inortuingajallunga erinnat takkuteriasaarnerisa kingorna – naammassisariaqarakkimmi, imminut piumaffiginikuugama. Erinnat takkutikulaarneq ajorput, takkukkaangatali  pisariniapallattarpakka."

Ilumoorpalussuseq uppernassuseqarnerlu

Nive Nielsenip ilumoorpalussuseqarnissani pingaartippaa, inuit nuannarisinnaasaannik taamaallaat anguniagaqarnani:

Tusarnaartussanuinnaq tulluussakkanik erinniornaveersaartarpunga. Tunniussaqarusunnerusarpunga uppernassusilimmik misigissusilimmillu. Taannartarpiaraalu nipilersornermi nipilersortartunilu nuannarisara – nipilersugaq ilumoorpalussuseqaraangat uppernassuseqarlunilu unneqqarissusilik.’

Nive Nielsenillu nammineq tusarnaartakkaminut assersuunneqarluarsinnaavoq:

Nuannarinerpaasama ilagivaat Arthuar Russel (amerikkarmioq agiarsuartartoq aamma erinniortoq aaqq.), Sun Ra (amerikkarmioq jazzimik erinniortoq, aaqq.), Howe Gelp Giant Sands-iminngaaneersoq aammalu Michael Hurley (amerikkarmioq, aaqq.).’

Nipilersorneq isiginnaartitsinerlu malittariipput

Nipilersornerup avataatigut Nive isiginnaartitsineq aamma aallutaraa, arlaleriarlunilu filmini peqataasareerluni. Ilaatigut ’The New World’ 2005-mi Colin Farell peqatigalugu, kiisalu 2018-mi ersinartuliami ‘The Terror’-mi:

"Isiginnaartitsineq nuannarivara, ’The Terror’-mullu ilaareernerma kingorna periarfissanik allanik nutaanik takkuttoqarnikuulluni. Disney film-imi annikitsuugaluartumik ilaasussanngorpunga qanittukkut saqqummertussami, Budapestiliangajalerpungalu nangeqattaartuliaaqqami BBC-kkut Colin Farell peqatigeqqillugu. Nuannerpoq eqqarsaatigalugu filmi siulleq ilaaffiginikuusanni aamma Colin Farell peqataammat. Aamma Islandimiut Sverigemiullu tv-kkut nangeqattaartuliaanni aappaagu saqqummertussami annikitsumik peqataaffigisussanngorakku . Ateqarpoq ’Thin Ice’.  Iluarpoq isiginnaartitsineq nipilersornerlu akuleriisillugit suliarisinnaallugit. Sorpassuartigut imminnut assigiissuteqaramik, torraaqaarlu isiginnaartitsinermiit nipilersornermut pisseqattaarsinnaagama. Aappaagu isiginnaartitsissusiami ’Skygger & Magi’-mi C.V. Jørgensen på Aveny T.-mut tunngasumut ilaassallunga."

Saqqummersitseqqiliivippoq

Nive nipilersoqatinilu annertuumik tusarnaartitseqattaarnikkut angalaartarneq ingerlattarpaa, iluatsittumillu nipilersukkami nunatta avataanut siammartersimallugu. Siunnersuuteqarporlu:

"Ajornarsinnaavoq taamak avinngarusimatigigatta. Nunattalu avataanukarniarneq akisunerujussua pisariunerujussualu. Takutitsivinnut peqataagit appisimaarlutillu, aaqqissuisussanik ajornanngippallu managerimik ujartuillutit. Aaqqissuisumilli nassaarnissaq pisariaqarluinnarpoq. Aaqqissuisunik arlariinnik pitsaasunik peqarpugut, tusarnaartitsinissagut taakku pilersaarusiortarpaat. Aallartigit, appisimaaqattaarit nuannarinnittussanillu katersillutit."

Nipilersoqatigiit USA-mut nipilersoriaqqusaaqattaartarput, amerlanertigulli allami nipilersortariaqartarlutik:

USA-mut qaaqqusaasarpugut, kisianni iliuuseqarsinnaassuserput killeqartarpoq USA-mut isernissamut visa piumasaqaataasarmat. Taamaammat Canadami appisimaallattaaginnavittarpugut, Canadamimi inatsisitik allanngortissimagamikkit nipilersortartut nunamut tikissinnaalersillugit immikkut qinnuteqaasiunngikkaluarlutik.

 

Annerusumik Nive and The Deer Children pillugit atuarit