Kodap pisortaa Covid-19 pillugu paasissutissiivoq

Kulturilerineq kulturilerisullu tamarmik Covid-19-mit eqqugaapput. Uani atuarsinnaavat Kodap pisortaata nappaat ilaasortanut Kodamullu qanoq sunniuteqarnersoq pillugu paasissutissiinera.

19. marts 2020 

Asasakka ilaasortat

Sapaatip akunnerini makkunani Koda suliffeqarfippassuartulli allatuulli Danmarkimiittuni allaffissuaq matoqqatippaa, sulisullu tamarmik angerlartinneqarlutik. Pisortaniit nalunaartoqaqqinnissaa tikillugu Koda angerlarsimaffitsinniit sulilluta ingerlatissavarput. Allaffissuatta matoqqatinnerata saniatigut ingerlatsinerput sullissinerpullu allannguuteqanngilaq. Pisarnitsitullu emailikkut oqarasuaatikkullu attavigineqarsinnaavugut.

Taamatullu oqareerluta, pissutsit allarluinnaapput. Covid-19 nunarsuaq tamakkerlugu ajornartorsiutaammat, peqqissutsikkut, aningaasaqarnerup tungaatigut, suliffeqarfeqarnikkut kiisalu kulturikkut annertoorujussuarmik kinguneqarpoq.

Massakkoqqissaaq upernaallu ingerlanerani tusarnaartitsinissarparujussuit unitsinneqarput, ilaasortarparujussuatsinnut aaqqissuisartunullu annertuumik aningaasaqarnikkut eqquisumik. Kodamiit eqqumaffigilluarparput amerlasoorpassuarnut eqquinera. Isertitassanik annaasaqarneq, nipilersortartut akissarsinngitsoornerat, erinniortut taalliortullu Kodamiit isertitassaraluaminnik annaasaqarnerat.

Isertitaqarfiusartullu aamma allat annaaneqarput. Cafét, neriniartarfiit imerniartarfiillu matoorarneqarnerinit nipilersukkanik appisimaarneq unippoq, Kodamullu akiliisarnerat taamaalilluni aamma unilluni. Reklameliortarneq aamma unippat tv-qarfiit radioqarfiillu aamma akissaaleqilertussaapput. Avaqqunneqarsinnaajunnaassaarlu aamma taakkunaniit isertitassaraluatsinnik annaasaqarneq. Qanorli annertutigisumik aningaasatigut malitseqassanersoq oqaatigiuminaakkallarpoq suli nalunarallartillugu qanoq sivisutigisumik maanna pisoq ingerlaassanersoq.

Sapaatip akunnerata siuliani nipilersornikkut kattuffiit Dansk Artist Forbund aamma Dansk Musikerforbund, annertuumik politikkikkut iliuuseqartoqarnissaannik sukataarlutik saaffiginnissuteqaqattaarsimapput, nipilersortartut tusind-ilikkaat aningaasaqarnerannut ajalusoornerujussuaq ikiorsiiffigineqarnissaat pillugu. Inuttut angerlarsimaffimminni aningaasaqarnerannut annertuumik eqqugaasussanngormata, Danmarkip iluani nunanilu allani tusarnaartitsinissarpassuit unitsinneqarmata. Dansk Live ulapippoq, aamma DJBFA, DPA, DKF aamma Musikforlæggerne politikkikkut sunniuteqarnissartik aamma sulissutigivaat, nipilersornerup iluani pinngorartitsisut aningaasatigut annaasassaat annertuallaannginnissaat pillugu.

Kulturimut Naalakkersuisoq Joy Mogensenip ilisimallugu nalunaarutigivaa eqqugaasut tamarmik akissarsiassaraluaminnut utertitsiffigineqarnissaat amerlasuunut iluaqutaanavianngitsoq. Eqqumiitsuliortullu namminersortut massakkut nalorninartorujussuarmik inissisimapput. Naalakkersuisoq piareersimavoq kulturilerisut kattuffiinik oqaloqatiginninnissaminut, tamannalu ajunngilluinnarpoq. Tamannalu isumaqarpoq susassaqartorpassuarniit pimoorussinikkut kulturikkut suliaqarneq ilanngullugu tapiissuteqartoqarnissaanut ilanngullugu eqqarsaatigilluarneqartoq. Ilutigisaanillu pisartagaqartarnermut inatsisit ammanerusumik suliareqqinnissaanut ingerlatsisoqarnerani, napparsimanermilu pisartagaqartoqarsinnaanissaanut suliat ingerlanneqarmata.

Pisortat maleruagassiissutaat malittarisassiaallu allanngortinneqaqattaarput ingerlaavartumik. Uagullu soorunalimi malinnaatillusi paasissutisseeqataasarumaarpugut arlaatigut ilissinnut attuumassutilinnik allannguisoqarsimatillugu suliassinnut ingerlatitsiinnarnissamut.

Massakkuugallartoq ataatsimeersuarnissaq aprilip 28.-nut inissinneqarallarpoq. Pilersaarut taamaakkallassaaq allannguuteqartoqarnissaa tikillugu.

Maanngaanniit inuulluaqqusivunga, imminnullu paarilluarnissassinnik kissaallusi.

 

 

Gorm Arildsen

Pisortaq