Persersorsuugaluartoq ukioq manna inuppassuit qilanaarsimallutik najuupput, Katuami Koda Awards arfininngornerup unnukkuani ingerlanneqarmat. FINNi Ukiumut Nersornaaserneqarpoq saqqummersitaanut ’Qanormita ippa’, Ivaanalu Isumalluarnartutut nersornaaserneqarluni saqqummersitaanut ’Jamaica’.
1991-mili Kodap Kalaallit Nunaanni erinniortunut taalliortunullu nersornaasiisalersimavoq, ukiorlu manna aamma nersornaasiineq ingerlanneqarluni. Arfininngorneq 5. marts Kulturip illorsuaani Katuami Koda Awards ingerlanneqarpoq.
Ukiumut Nersornaat 2021 FINNi-mut tunniunneqarpoq, Isumalluarnartutut Nersornaat 2022 Ivaanamut tunniunneqarluni. Nersornaasiinissamut aalajangiisuupput: Arctic Soundsimiit Laura Lennert Jensen, Maritha Broberg Nunatsinni Nipilersortartut Kattuffianniit, Thora Monrad Hansen KNR-miit, Jakob Søvndahl Skovaa Katuamiit, kiisalu Dida G. Heilmann Kodamiit aallartitatut.
Ukiumut Nersornaat 2021: Tusarnaartitsinermini immikkut isiginiarneqartoq
FINNi Andachan suleqatigalugu albummimik saqqummersitsipput, nipilersoriaatsit assigiinngitsut akulerullugit, inuppassuarnillu tusarnaarneqarsimallutik.
”Erinnat siammasissumik ilusilersugaapput, nipilersoriaatsillu assigiinngitsut atorneqarnerminni erinnanut taallanullu tiguartinnartumik. Nipilersoqatigiit immikkuullarissutigivaat saqqummersitsitatut pitsaatigisumik tusarnaartitsisimanerat,” tunngavilersuutit ilaatigut taamannak nassuiarneqarput FINNip Ukiumut Nersornaaserneqarneranut.
Isumalluarnartutut Nersornaat 2022: Immikkuullarissutsini nassaarisimavaa
Isumalluarnartutut 2022-mi nersornaaserneqarpoq Ivaana, iTunesikkut erinnanik tallimanik saqqummersitsisimasoq.
”Ivaanap nipilersornerup silarsuaani immikkuullarissutsini nassaarisimavaa. Nammineerluni saqqummersitseqqaarnerata takutippaa nammineq nipissami inississimanera. Saqqummersitaq nipigissoq, takutitsineralu pitsaalluinnartoq. Tunngasuunera taamaattorli ineriartoqqissimanera saqqummersitsinerata ersersipaa,” taamatut tunngavilersorlugu Ivaanap Koda Awards 2022-mi Isumalluarnartutut Nersornaaserneqarpoq.
Siornatigut nersornaaserneqarsimasut tigussaasumik tunineqarput
Siornatigut nersornaaserneqartarsimasut allagartamik naasunillu tunisittarsimapput. Siorna Koda Awardsimi neriorsuivugut siornatigut nersornaaserneqareersimasut tamarmik nersornaammik tigussaasumik aamma tunineqarumaartut. Nersornaasiinerlu naammassimmat nuaannaarutigingaakkatsinnk Kodamiit nersornaaserneqarsimasunut najuuttunut agguaavugut. Nersornaaserneqarsimasullu peqataanissaminnut periarfissaqarsimanngitsunut pissaat nassiussuunneqarumaarput.
Ukiumut Nersornaammut innersuunneqartut tassaapput:
- FINNi saqqummersitaminut ’Qanormita ippa?’
- Uummatip Nipaa aamma Tønnes Kreutzmann erinarsoqatigiittut Kalaallit Nunaanni nutaaliortutut.
- Toornat saqqummersitaannut ’Inuiaat ’
Isumalluarnartutut Nersornaammut innersuunneqarput:
- Ivaana saqqummersitaannut ’Jamaica’
- Malik Lennert sisamariarluni saqqummersitsisimaneranut 2020-mi aamma 2021-mi.
- Athena Lings erinnamut ‘Depression In The Roads’
