Erinniortut Koda Awardsimi nersorniarneqarput

Arfininngornerup unnukkuani 16. Januar nipilersornerup silarsuaani persuarsiorneq pivoq, Koda Awards nuummi Hotel Hans Egede-mi ingerlanneqarmat. Ukiumut Nersornaat 2019-mut Gerth Lyberth toqqarneqarpoq, Ukiumut Nersornaat 2020-mut ÎVA toqqarneqarpoq (Gustav Lynge Petrussen, Josef Tarrak Petrussen), Jens Kleist Isumalluarnartutut Nersornaaserneqarpoq kiisalu Angut Clasen Ataqqinaammik Nersornaaserneqarluni. 
Ukiumut Nersornaat 2019 – Gerth Lyberth

Gerth Lyberth Ukiumut Nersornaat 2019-mut toqqarneqarpoq saqqummersitaminut: Gerth – Anorisaat. Ilaatigullu aalajangiisartut imatut tunngavilersorput:”Nipi erinnioriaaserlu immikkuullarissoq, piffissamullu aalajangersimasumut pituttugaanngitsoq.

Nersornaaserneqartullu saniatigut Josef Tarrak innersuunneqarpoq saqqummersitaanut taasaminik Tarrak; Inuiaqatigiinnik tinnersaasoq unneqqarissumik sapiissusilimmillu eqeersaasoq. Oqaatsit nipillu eqaatsumik atorlugit oqaluttuamik ilivitsumik oqaluttuartoq.

Rasmus Lyberth innersuunneqarsimavoq saqqummersitaanut “Livet skal leves på ny” Taallat nipillu kimillit aqqutigalugit, oqariartuuteqarluni nunarsuarmioqataanermik inuunerullu isumaanik nalunaajaasoq.

Ukiumut Nersornaat 2020 -  ÎVA (Gustav Lynge Petrussen, Josef Tarrak Petrussen)

ÎVA tassaavoq illuatungeriit tulluariissut naapinneranni nutaarluinnarnik tusarneqarsimanngitsumillu nipilersuusiorneq iluatsilluartoq. Taallanik erinnanillu ulluinnarpalaartunik imminnullu tulluarluinnartunik tusarnersunillu tusaqqoornartuliorlutik saqqummersitaat pillugu innersuunneqarsimapput.

Nersornaaserneqartut saniatigut Varna saqqummersitaalu “The Road” innersuunneqarsimavoq; Erinnat taallallu kissalaamik anersaanisimaarnartumillu tunisisut. Saqqummersitaa kingulleq tuniserusussusermik erinnanillu nipigilluaqatigiissunik (flotte harmonier) imaqartoq innersuunneqarpoq.

Nipilersoqatigiit Pukuut innersuunneqarsimapput saqqummersitaannut kingullermut taasimasaat “Minutsit Kingulliit”; Nipilersoriaaseq sakkortooq tassaarsuartut ittoq, taallallu sapiissusilimmik inuiaqatigiinnik isornartorsiuisut, oqaatigineqarumanngitsunillu oqariartuutillit. Saqqummersitaq teknikkikkut periarfissat annertuunik imaqartoq takutikkaat ilaatigut aalajangiisartut tunngavilersuutigaat.

Isumalluarnartumut Nersornaat – Jens Kleist

Rappertartoq Jens Kleist Isumalluarnartutut nersornaaserneqarpoq aalajangiisartut nalilermassuk oqaatsinik, akuttoqatigiissaarinermik erinnanillu akunnattoorfeqarani ippinnanngitsumillu ataatsimoortitsisinnaalluartartoq. Saqqummersitat flow-igissut, erinnallu tusaruminartut pillugit isumalluarnartutut innersuunneqarpoq.

Nersornaaserneqartup saniatigut Andachan innersuunneqarsimavoq elektroniskimik ilaatigut nipilersoriaaseq Dubstep atorlugu.

Kiisalu Zika: Saqqummeriaaseq immikkuullarissoq piffissamut naleqquttoq nunarsuarmioqataanermillu takutitsisoq. Nipi eqaatsoq qataannermiit qatituumut angalaarsinnaasoq, nunatsinnilu tusakulanngisarput pillugu isumalluarnartutut innersuunneqarsimalluni.

Ataqqinaammik nersornaat – Angut Clasen

Ukioq manna Angut Clasen ataqqinaammik nersornaaserneqarpoq, nipilersoqatigiinni ukioq manna ukiuni 45-nngortorsiortuni Inneruulaniit. Aalajangiisartuniillu uku tunngavilersuutigineqarsimapput: “Oqaaserpassuit atunngikkaluarlugit imartuunik isumaqarluartunillu taalliortarnermigut, erinnanillu tusaqqoornartunik erinniortarnermigut, ukiut ingerlaneranni nipilersornerup tungaatigut annertuumik sunniuteqarpoq. Inuk nuimaniartuunngilaq namminiussuseqarluarlunili, naleqartitanik kinaassutsimillu pingaartitsisoq.”

Aalajangiisartut

Ukioq manna aalajangiisuusut tassaapput, KNR sinnerlugu Aminnguaq Dahl Petrussen, Eigil Petersen Katuamiit, Georg Olsen Nunatsinni Nipilersortartut Kattuffianniit, kiisalu Kodap nipilersornikkut ilisimasalittut Katsi Kleist Eriksen, Peter Tuusi Motzfeldt aamma Jensia Hæjgaard Dam.