Nunat Avannarliit Københavnip qeqqani kulturikkut aaqqissuuttaligaat nittarsaaffitsialaavoq aamma inuussutissarsiutigalugu ingerlatsisunik attavittaartorluarfiuvoq, taama isumaqarput Christian Elsner, Nanook; Eivør aamma Guðrið Hansdóttir, Byrta.
Danskit festevaleqartarnerini naliginnaasuunngilaq backstage-mi savalimmiusut, islandimiusut aamma kalaallisut oqaluttoqartarnera. Kisiannili taamaasiortoqaqaaq Frigg Festival siulleq ingerlanneqarmat, 9 aamma 10 maj, Kongens Have-mi, Københavnimiittumi.
Nunat avannarlermiut nipilersugaannik, nerisassaataannik, atisaliarisartagaannillu ilisisarititsinissamik kissaateqarnerup Festivali pilersippaa, Kalaallit Nunaannillu nipilersortartut plakatimi aternik pingasunik ilaatitaqarput, katillugit 21-nik inuttalinnik.
Suliniut pitsak
Eivør nipilersorfimmi annermi tallimanngornermi tusarnaartitsivoq, danskillu illoqarfiisa pingaarnersaasa qeqqani anerasaartarfimmi qorsooqqissumi, nipilersornikkut aaqqissuussamut kusanartumik avatangiisilimmut, nipilersoriartoqqusaanini iluarisimaarluarpaa.
’Isumaqarpunga suliniut pitsaasorujussuusoq, nunat avannarlermiullu nipilersortartuisa Københavnimi katersorneqarnerat torrallataalluinnarpoq, assigiissuteqaqaagummi, qaqutiguinnarli ataatsimoorussamik naapeqatigiiffeqartarluta. Neriuppunga festivali danskinit tigulluarneqarumaartoq paasissagaallu nunani avannarlerni allani nipilersornikkut pissanganartunik pisorpassuaqartartoq, aaqqissuussaq savalimmiormiunuinnaq, kalaallinuinnaq islandimiuinnarlu sammisinneqaleqqunagu’, Eivør oqarpoq.
Attaveqarfini amerlisarpai
Erinarsortartoq erinniortorlu Syðrugøta-meersoq kisimi festivalimik nuannaarutiginnittuunngilaq. Guðrið Hansdóttir Byrta-meersoq aamma suliniummik iluarisimaarinneqaaq.
’Torrassuuvoq nipilersortartunik Kalaallit Nunaanneersunik, Islandimeersunik Danmarkimeersunillu naapitsinissatsinnut periarfissaqaleratta, attaveqaativut amerlipput, tamannalu pingaaruteqarpoq nipilersortarnerup silarsuaanut. Nipilersornermi aqqit taama amerlatigisut pikkunarluinnartut, soorlu Medina, festivalip pissarsiarisinnaasimammagit torrassuuvoq’.
Igalaaq nittarsaaffik pitsak
Frigg Festivalimut peqataanissartik sioqqullugu Nanook, nunatsinneersut, ullualunni Københavnimi sungiusartarfimmiipput, guitarertuatalu Christian Elsnerip aaqqissuussami angisuumi peqataanertik nersualaarinninnertut isigaa.
Uatsinnut assut pingaaruteqarpoq Frigg Festivalimut peqataanerput, inunnguuseralugit oqaatsit atorlugit erinarsortartuulluni festivalinut peqataaniartarneq ajornakusoortarpoq. Danmarkimi nipilersorfissarsiortarnissamut festivali una nittarsaaffiuvoq pitsaalluinnartoq. Uatsinnik 100 procentimik ilisarisimannitsunut nipilersortarpugut, nuannaarpugullu takornartanik tusarnaartoqarluta nipilersoratta. Neriuppugut fansertaarsimassalluta’, Christian Elsner oqarpoq.
Nunat kulturiinut tunngavissat
Naak ammaanersiornermi sila pitsaanerpaajunngikkaluartoq, savalimmiormiut, islandimiut, kalaallit danskillu, festivali, Annika Biskopstø, Steintur Rasmussen, Hans Peter i Brekkunum aamma Barbara Holm-it aaqqissuunneqartoq, sialualaarnera soqutiginagu aallartiinnartoq peqataajartorfigaat.
’Nunat uku sisamat assigiissuteqaqaat aammali assigiinngitsorujussuullutik. Uatsinnut takorluugaasimavoq nunat taakku ilisaritinnissaat, tusarnaariat nuannersumik misigisaqarsinnaaqqullugit’, Barbara Holm oqaluttuarpoq, nerisassaalunnik nunanit avannarlerneersunik puuguttamut katersanik, niuerfeerarpassuit ilaanni pisiarineqarsinnaasunik, tamuluutigaluni’.
’Uanga angerlarsimaffigisanni aamma savalimmiormiut 700-it islandimiullu 300-it najugaqarput, savalimmiormiunullu islandimiunullu Danmarkimiittunut assigiinngitsorpassuarnik aaqqissuussisoqartarpoq, kisianni aaqqissuussatut matumatut annertutiginngitsunik. Taamaattumik neriuppugugut festivaali manna nunat taakku sisamaasut kulturiinik tunngaviliisinnaasoq, ukiumullu ataasiarluni nuannersumik misigisitsisarfiussalluni, Københavnimi naapittarfik’, taama isumaqarpoq aallarniisut ilaat savalimmiormioq, Amagerbro-mi najugaqartoq
Nipilersukkat nunarsuarmioqataasutut qaffasissusillit
Barbara Holmip isumaa malillugu Frigg Festival tassaannaanngilaq nunat nukkatut taaneqarsinnaasat nipilersugaannik nuannersunik danskinut tusarnaartitsiffissaq, nipilersortartummi avannarlermiut danskit aviisini tusarsaanngivissormata – aqqit tusaamasarujussuit Teitur aamma Bjørk eqqaassanngikkaanni.
Isumaqarpunga savalimmiut, islandimiut aamma kalaallit nipilersortagaat pitsaassutsimikkut nunarsuarmioqatigiinnut nallersuunneqarsinnaasut. Nipilersortartoqartuarpoq nunani allani soorlu Østrigimi, Tysklandimi USA-milu tusaamasaalersartunik, isumaqarluinnarpungalu danskit tamakkuninnga ilisimasaqanngilluinnarunik annertuumik arajutsisaqarsimassasut. Festivalimili siunnertat pingaarnerisarinngilaat nunanit pineqartunit nipilersukkat qanoq nuannertiginerisa danskinut tusartinnissaat. Kisianni soorunami neriuutigaara ilisimanninngikkaluittaaq pissarsiaqarluartarumaartut’, festivalimik aaqqissuusseqataasoq oqarpoq.
Aappaagu aamma festivaleqartoqassaaq
Guðrið Hansdóttir-ip neriuutigaa Frigg Festival ataasiartaannaassanngitsoq, nunanulli peqataatitaqartunut angallanneqarsinnaalerumaartoq. Tassunga atatillugu Barbara Holm ima oqarpoq:
’Maanna oqaatigereersinnaavarput festivali ima iluatsilluartigimmat aamma aappaagu ingerlanneqaqqissalluni. Maannatut ittillugu aappagu aamma Københavnimiissaaq, isumali pinnguarisarput tassaavoq festivalip Reykjavikkimut, Nuummut Thorshavnimullu ingerlateqqinneqarsinnaanera. Taamaattoqarsinnaappat pissanganaqqajaqaaq. Aappaatigulli Reykjavikkimi Thorshavnimilu festivalerpassuaqareerpoq, taakkulu unammillernissaat uagut soqutigisarinngilarput’.
Annerusumik atuarit uani Frigg Festivalen
